அதிமுக கூட்டணியில் தொகுதிகள் ஒதுக்கீடு.. பாமக, தேமுதிக திடீர் புறக்கணிப்பால் குழப்பமோ குழப்பம்

மக்களவைத் தேர்தலில் அதிமுக கூட்டணிக் கட்சிகள் போட்டியிடும் தொகுதிகளின் பட்டியல் இன்று வெளியிடப்பட்டது. பட்டியல் வெளியீட்டின் போது கூட்டணியில் இடம் பெற்றுள்ள பாமக, தேமுதிக ஆகிய கட்சிகளின் தலைவர்கள் யாரும் பங்கேற்காததால் கூட்டணியில் இன்னும் குழப்பம் நீடிப்பதாக தகவல்கள் வெளியாகி கூட்டணிக் கட்சிகள் தொண்டர்கள் பெரும் அதிர்ச்சி அடைந்துள்ளனர்.

மக்களவைத் தேர்தலை எதிர்கொள்ள அ.தி.மு.க. தலைமையில் பெரும் இழுபறி, குழப்பங்களுக்கு இடையே மெகா கூட்டணி முடிவானது. இந்தக் கூட்டணியில் இடம்பெற்றுள்ள பாஜகவுக்கு 5, பாமகவுக்கு 7, தேமுதிக.வுக்கு 4, தமாகா., புதிய தமிழகம், புதிய நீதிக்கட்சி, புதுச்சேரியில் என்.ஆர் காங்கிரஸ் ஆகியவற்றுக்கு தலா 1 என தொகுதிகள் ஒதுக்கப்பட்டுள்ளன. மீதமுள்ள 20 தொகுதிகளில் அதிமுக போட்டியிடுகிறது.

இந்த கூட்டணியில், இடம் பெற்றுள்ள கட்சிகள் எந்தெந்த தொகுதிகளில் போட்டியிடும் என்ற தொகுதி ஒதுக்கீடு பட்டியலை கிரவுன் பிளாசா ஓட்டலில் நடைபெற்ற செய்தியாளர்கள் சந்திப்பில் அதிமுக ஒருங்கிணைப்பாளர் ஓ பன்னீர்செல்வம் மற்றும் இணை ஒருங்கிணைப்பாளர் எடப்பாடி பழனிசாமி ஆகியோர் பட்டியலை வெளியிட்டனர்.

அதிமுக போட்டியிடும் 20 தொகுதிகள் விபரம் தென் சென்னை, திருவள்ளூர், காஞ்சிபுரம்,
திருவண்ணாமலை,சேலம்,நாமக்கல்ஈரோடு,திருப்பூர்,நீலகிரி,பொள்ளாச்சி,கிருஷ்ணகிரி,கரூர்,பெரம்பலூர்,சிதம்பரம்,நாகை,மயிலாடுதுறை,மதுரை,தேனி,நெல்லை,ஆரணி ஆகிய தொகுதிகளில் அதிமுக போட்டியிடுகிறது.

பாட்டாளி மக்கள் கட்சி போட்டியிடும் தொகுதிகள்: திண்டுக்கல்,மத்திய சென்னை,ஸ்ரீபெரும்புதூர்,அரக்கோணம்,தர்மபுரி,கடலூர்,விழுப்புரம் ஆகிய 7 தொகுதிகள் ஒதுக்கப்பட்டுள்ளது.பாஜக போட்டியிடும் தொகுதிகள்: கன்னியாகுமரி, தூத்துக்குடி, சிவகங்கை, ராமநாதபுரம், கோவை ஆகிய 5 தொகுதிகள் ஒதுக்கப்பட்டுள்ளது.

தேமுதிக போட்டியிடும் தொகுதிகள் : வடசென்னை,கள்ளக்குறிச்சி,திருச்சி,விருதுநகர் ஆகிய 4 தொகுதிகள் ஓதுக்கீடு.

புதிய தமிழகம் கட்சி: தென்காசி

தமிழ் மாநில காங்கிரஸ் கட்சிக்கு தஞ்சாவூர் தொகுதியும் புதிய நீதிக்கட்சிக்கு வேலூர் தொகுதியும் என்.ஆர். காங்கிரஸ் கட்சிக்கு புதுச்சேரியும் ஒதுக்கப் பட்டுள்ளது.

தொகுதி ஒதுக்கீடு பட்டியல் அறிவிப்பு பட்டியல் வெளியிடப்பட்ட போது அதிமுக தலைவர்களுடன் பாஜக தரப்பில் தமிழக தலைவர் தமிழிசை சவுந்திரராஜன், பாஜக அகில இந்திய பொதுச் செயலாளர் எச்.ராஜா ஆகியோர் மட்டுமே பங்கேற்றனர். பாமக, தேமுதிக தரப்பில் யாரும் பங்கேற்காதது கூட்டணியில் இன்னும் குழப்பம் நீடிப்பதையே அப்பட்டமாக வெளிப்படுத்தியுள்ளதால் கூட்டணிக் கட்சிகளின் தொண்டர்கள் பெரும் அதிர்ச்சி அடைந்துள்ளனர்.

Get our website tamil news update in your mail inbox: Subscribe to The Subeditor - Tamil news website | RSS by Email

மேலும் செய்திகள்