ஏதேனும் ஒரு ஆதாரத்தை காட்ட முடியுமா? - மத்திய அரசுக்கு ப.சிதம்பரம் குடும்பம் சவால்

by Nagaraj, Aug 27, 2019, 21:10 PM IST

எங்கள் குடும்பத்தின் உறுப்பினர் யாருக்கும் கணக்கில் காட்டப்படாத ஒரு வங்கிக் கணக்கோ, சொத்தோ,போலி நிறுவனமோ என்று ஏதேனும் ஒன்று இந்த உலகத்தில் இருப்பதற்கான ஆதாரத்தை காட்டத் தயாரா? என மத்திய அரசுக்கு ப.சிதம்பரம் குடும்பத்தின் சார்பில் சவால் விடுக்கப்பட்டுள்ளது.

ஐஎன்எக்ஸ் மீடியா முறைகேடு வழக்கில் முன்னாள் மத்திய அமைச்சர் ப.சிதம்பரம் கடந்த 21-ந்தேதி கைது செய்யப்பட்டார். அவரை சிபிஐ காவலில் எடுத்து விசாரித்து வருகிறது. அவருக்கு ஜாமீன் கேட்டு உச்ச நீதிமன்றத்தில் பரபரப்பான விவாதங்கள் நடைபெற்று வருகிறது.

இதற்கிடையில், ப.சிதம்பரம் கைது செய்யப்பட்டது முதலே, அவரது குடும்பத்தினருக்கு வெளிநாடுகளில் ஏகப்பட்ட சொத்துகள் இருப்பதாகவும், வெளிநாட்டு வங்கிகள் பலவற்றிலும் கணக்கு வைத்திருப்பதாகவும் ஆங்கில ஊடகங்களில் தினமும் செய்திகள் வெளியாகி வருகின்றன. அதற்கான ஆதாரங்கள் என சில ஆவணங்களையும் வெளியிட்டு பரபரப்பை மேலும் அதிகரித்து வருகின்றன.

இதையெல்லாம் கண்டு ப.சிதம்பரத்தின் குடும்பத்தினர் கொந்தளித்துள்ளனர். இதனால் ப.சிதம்பரத்தின் குடும்பத்தின் பெயரில் இன்று ஒரு அறிக்கை வெளியிடப்பட்டுள்ளது. இந்த அறிக்கையை ப.சிதம்பரத்தின் மகனும் எம்.பி.யுமான கார்த்தி சிதம்பரம் தன் ட்விட்டர் பக்கத்தில் வெளியிட்டுள்ளார். அதில், கடந்த சில நாட்களாக பல்வேறு ஊடகங்களில் ப.சிதம்பரத்துக்கு எதிராக எந்தவித ஆதாரமில்லாத செய்திகள் பரப்பப்பட்டு வருவதை மிகுந்த மன அழுத்தத்தோடு குறிப்பிட விரும்புகிறோம்.

ப.சிதம்பரத்தை அச்சுறுத்தும் வகையிலும் அவமானப்படுத்தும் வகையிலும் உள்நோக்கத்தோடும் மத்திய அரசு செயல்பட்டுக் கொண்டிருப்பதை நாங்கள் புரிந்துகொண்டுள்ளோம். ஆனால் அரசின் இந்த பழிவாங்கல் நடவடிக்கைக்கு எதிராக நிற்க வேண்டிய ஊடகங்களின் நிலையை எண்ணும் போது வருத்தமாக உள்ளது.

சட்டத்தின் முன் குற்றவாளி என்று நிரூபிக்கப்படும் வரை குற்றம் சாட்டப்பட்ட அனைவரும் நிரபராதிகள்தான். இதனால் வாய்மை ஒரு நாள் வெல்லும் என்பதில் நாங்கள் உறுதியாக இருக்கிறோம். இந்திய அரசியலில், ப.சிதம்பரம் ஐம்பது ஆண்டுகளுக்கும் மேலாக அப்பழுக்கற்ற பொதுவாழ்க்கையைக் கொண்டவர். இப்போது நடப்பது போன்ற இழிவுபடுத்தும் பிரச்சாரங்களால் அவர் இந்த தேசத்துக்கு ஆற்றிய அரும்பணிகளை மறைத்துவிட முடியாது.

நாங்கள் ஒரு சிறு குடும்பமாக எங்களுக்கு போதுமான செல்வங்களைப் பெற்றிருக்கிறோம்.  நாங்கள் அனைவருமே வருமான வரியும் கட்டிக் கொண்டிருக்கிறோம். எனவே எங்கள் குடும்பத்தினர் யாருக்கும் சட்டத்துக்குப் புறம்பான வழியில் பணம் ஈட்டும் தேவையும் அவசியமும் இல்லை.

எனவே தான் எங்களுக்கு பல நாடுகளில் சொத்துக்கள் இருக்கின்றன. பல வெளிநாட்டு வங்கிகளில் கணக்குகள் இருக்கின்றன. ஏராளமான போலி நிறுவனங்கள் இருக்கின்றன என்ற செய்திகளையெல்லாம் பார்த்து நாங்கள் அதிர்ச்சியடைந்திருக்கிறோம். இவ்வாறு வெளியாகும் செய்திகள் எல்லாமே கட்டுக்கதைகள். இவையெல்லாம் பொய் என்பது விரைவில் அம்பலமாகும்.

மேலும், மத்திய அரசுக்கும் இந்த வழக்கு தொடர்பாக சவாலாக ஒன்றை தெரிவிக்க விரும்புகிறோம். எங்கள் குடும்பத்து உறுப்பினர்கள் யாருக்காவது கணக்கில் காட்டப்படாத ஏதேனும் ஒரு சொத்து அல்லது ஏதேனும் ஒரு வங்கிக் கணக்கு அல்லது ஏதேனும் ஒரு போலி நிறுவனம் இந்த உலகத்தில் எங்கேனும் இருக்கிறது என்பதற்கான ஆதாரத்தை காட்ட முடியுமா? என சவால் விடுகிறோம் என அறிக்கையில் கூறப்பட்டுள்ளது.

மேலும் ஊடகங்களும் கண்ணியத்தையும், கட்டுப்பாட்டையும் கடைப்பிடித்து ஊடக சுதந்திரத்தை நிலை நிறுத்துங்கள். ஊடகங்கள் உள்ளிட்ட அனைவருக்கும் சட்டம்தான் எப்போதும் பாதுகாப்பு அளிக்கும் என்பதை நினைவில் கொள்ளுங்கள் என்பதை வேண்டுகோளாக தெரிவித்துக் கொள்கிறோம் என்று ப.சிதம்பரம் குடும்பத்தின் சார்பில் வெளியிடப்பட்டுள்ள அறிக்கையில் கூறப்பட்டுள்ளது.


Speed News

  • சமயத் தலைவர்களுடன் 

    தலைமை செயலர் ஆலோசனை

    கொரோனா ஊரடங்கு கட்டுப்பாடுகள் தளர்த்தப்பட்ட நிலையில், வரும் 6ம் தேதி முதல் வழிபாட்டுத் தலங்களை திறக்கலாம் என்று மத்திய அரசு அறிவித்துள்ளது. தமிழகத்தில் இது தொடர்பாக முடிவெடுப்பதற்காக இன்று மாலை 4.45 மணியவில் ஆலோசனைக் கூட்டம் நடைபெற்றது. தலைமைச் செயலகத்தில் பல்வேறு சமயத் தலைவர்களுடன் இன்று மாலை நடக்கும் கூட்டத்தில் தலைமைச் செயலாளர் சண்முகம் ஆலோசனை நடத்தவுள்ளார். 

    Jun 3, 2020, 14:46 PM IST
  • சென்னை ராயபுரத்தில் 
    3 ஆயிரம் பேருக்கு கொரோனா
     
    சென்னையில் இது வரை 16,585 பேருக்கு கொரோனா பாதித்துள்ளது. குறிப்பாக, ராயபுரம் மண்டலத்தில்  3,060 பேருக்கு கொரோனா தொற்று உறுதி செய்யப்பட்டுள்ளது. மற்ற மண்டலங்களில் பாதிப்பு வருமாறு:   கோடம்பாக்கம் - 1,921, தண்டையார்பேட்டை -  2,007, திரு.வி.க.நகர் -  1,711, தேனாம்பேட்டை - 1,871, அண்ணாநகர் - 1,411, வளசரவாக்கம் -  910, அடையாறு - 949, அம்பத்தூர் - 619, திருவொற்றியூர் - 559, மாதவரம் - 400, மணலி - 228, பெருங்குடி - 278
    ஆலந்தூர் - 243, சோழிங்கநல்லூர் - 279
     

     
    Jun 3, 2020, 14:42 PM IST
  • டெல்லி அரசில் சம்பளம்

    போட பணம் இல்லை..

    டெல்லி துணை முதல்வர் மணீஷ் சிசோடியா இன்று அளித்த பேட்டியில், ‘‘டெல்லி அரசு ஊழியர்களுக்கு சம்பளம் போடவும், சாதாரணச் செலவுகளுக்கும் மாதம் ரூ.3500 கோடி தேவை. ஆனால், கடந்த 2 மாதங்களாக ஜி.எஸ்.டி வசூல் தலா ரூ.500 கோடி அளவில்தான் உள்ளது. மற்ற வழிகளிலும் ரூ.1735 கோடி வருவாய் மட்டுமே கிடைத்துள்ளது. எனவே, மத்திய அரசாங்கம் டெல்லி அரசுக்கு உடனடியாக ரூ.5 ஆயிரம் கோடி நிதி அளிக்க வேண்டும்’’ என்றார். 

    May 31, 2020, 14:10 PM IST
  • தொழிலாளர்களுக்கு எவ்வளவு

    கொடுத்தீர்கள்.. கபில்சிபல் கேள்வி

     

    காங்கிரஸ் மூத்த தலைவர் கபி்ல் சிபில், பிரதமர் மோடிக்கு ஒரு கேள்வி எழுப்பியுள்ளார். அவர் கூறுகையில், ‘‘பி.எம். கேர் நிதியில் இருந்து இது வரை எத்தனை தொழிலாளர்களுக்கு எவ்வளவு பணம் கொடுத்தீ்ர்கள்? இந்த ஊரடங்கு காலத்தில் பல தொழிலாளர்கள் பலியாகியுள்ளனர். சிலர் ரயிலில் இறந்து்ள்ளார்கள். சில நடக்கும் போது இறந்துள்ளார்கள். சிலர் பசியால் மடிந்துள்ளார்கள். நீங்கள் எவ்வளவு தொகை கொடுத்தீ்ர்கள் என்று பதில் கூற வேண்டும்’’ என்றார்

    May 31, 2020, 14:07 PM IST
  • தெருவுக்கு வாங்கய்யா..

    யஷ்வந்த் சின்கா ட்விட்

    முன்னாள் மத்திய அமைச்சர் யஷ்வந்த் சின்கா இன்று ஒரு ட்விட் பதிவிட்டுள்ளார். அதில், ‘‘ஏழைகளின் துயரங்களை கவனிக்காமல், மத்திய அரசு கண்களையும், காதுகளையும் மூடிக் கொண்டிருக்கும் போது, எதிர்க்கட்சிகள் வெறும் மனுக்களை கொடுத்து கொண்டிருப்பது சரியா? இதற்கு மேலும் வெறும் அறிக்கைகள் எதுவும் பலனளிக்காது. எதிர்க்கட்சிகள் அனைத்தும் தெருவுக்கு வந்து போராட வேண்டும்’’ என்று கூறியுள்ளார். 

    May 23, 2020, 14:18 PM IST