தென் மண்டல பொறுப்பாளராக அறிவிக்கப்பட்டவுடன் திருநெல்வேலியில் கனிமொழி எம்.பி செய்தியாளர்களை சந்தித்தார். அப்போது, முன்னாள் முதலமைச்சர் எடப்பாடி பழனிசாமி மற்றும் அதிமுக அரசு மீது கடுமையான குற்றச்சாட்டுகளை முன்வைத்தார். குறிப்பாக, பொள்ளாச்சி பாலியல் வழக்கில் சிபிஐ விசாரணைக்கு உத்தரவிட வேண்டிய நெருக்கடிக்கு எடப்பாடி பழனிசாமி அரசு தள்ளப்பட்டது குறித்து அவர் விளக்கமளித்தார்.
கனிமொழி பேசுகையில், "எடப்பாடி பழனிசாமி மீது நம்பிக்கை இல்லாத காரணத்தினால்தான், பொள்ளாச்சி பாலியல் வழக்கை சிபிஐ விசாரணைக்கு மாற்ற வேண்டிய கட்டாயம் ஏற்பட்டது. அதிமுக ஆட்சியில் இந்த வழக்கில் முறையாக நடவடிக்கை எடுக்கப்பட்டிருந்தால், சிபிஐ விசாரணைக்கு மாற்றியிருக்க வேண்டிய அவசியம் ஏற்பட்டிருக்காது.
இந்த விவகாரத்தில் வெட்கப்பட வேண்டியது எடப்பாடி பழனிசாமிதான். அதிமுக ஆட்சியில், பொள்ளாச்சி பாலியல் வழக்கு விசாரணையின்போது, தமிழ்நாட்டில் நியாயமான விசாரணை கிடைக்காது என்று மக்கள் நம்பினர். சம்பந்தப்பட்ட குற்றவாளிகள் மீது வழக்கு பதிவு செய்யக்கூட எடப்பாடி பழனிசாமி அரசு தயாராக இல்லை. அதிமுக அரசு தாங்களாக முன்வந்து இந்த வழக்கில் நடவடிக்கை எடுக்கவில்லை.
வரும் தேர்தலில் தென் மண்டலத்தில் உள்ள அனைத்து தொகுதிகளிலும் திமுக மற்றும் அதன் கூட்டணி கட்சிகள் வெற்றி பெறும். தமிழகம் முழுவதும் திமுக கூட்டணி வெற்றி பெறும் என்பதில் எனக்கு முழு நம்பிக்கை உள்ளது. மக்கள் திமுகவின் மீது வைத்துள்ள நம்பிக்கையை காப்பாற்றும் வகையில், திமுக அரசு செயல்பட்டு வருகிறது. திமுக ஆட்சி பொறுப்பேற்ற பிறகு, பல்வேறு திட்டங்கள் மற்றும் மக்கள் நலப் பணிகளை சிறப்பாக செயல்படுத்தி வருகிறது. குறிப்பாக, பெண்களுக்கு இலவச பேருந்து பயணம், மகளிர் உரிமைத்தொகை போன்ற திட்டங்கள் பெண்களின் வாழ்வில் பெரும் மாற்றத்தை ஏற்படுத்தியுள்ளது. இந்த திட்டங்கள் மக்களிடையே பெரும் வரவேற்பை பெற்றுள்ளது.
திமுக அரசு, மக்களுக்கான அரசாக செயல்பட்டு வருகிறது. மக்களின் தேவைகளை அறிந்து, அதற்கேற்ப திட்டங்களை செயல்படுத்தி வருகிறது. திமுகவின் இந்த செயல்பாடுகள், வரும் தேர்தலில் எதிரொலிக்கும்"
இவ்வாறு அவர் தெரிவித்தார்.
.jpg)
