திருநெல்வேலி அருகே, கடந்த 2022-ம் ஆண்டு பாறை சரிந்து 4 தொழிலாளர்கள் பலியான அடைமிதிப்பான்குளம் கல் குவாரிக்கு மீண்டும் அனுமதி வழங்குவது தொடர்பான கருத்துக்கேட்பு கூட்டத்தில், சுற்றுச்சூழல் ஆர்வலர் முத்துராமன் கடுமையான எதிர்ப்பு தெரிவித்தார். குவாரியை மீண்டும் திறந்தால் ஏற்படும் பேரழிவுகள் குறித்து ஆதாரங்களுடன் அவர் எடுத்துரைத்தது கூட்டத்தில் பெரும் அதிர்வலைகளை ஏற்படுத்தியது.
*விபத்தும், மூடப்பட்ட குவாரியும்:*
2022-ம் ஆண்டு, மே மாதம் 14-ம் தேதி சங்கரநாராயணன் என்பவருக்குச் சொந்தமான இந்தக் கல் குவாரியில் நடந்த கோர விபத்தில் நான்கு தொழிலாளர்கள் பரிதாபமாக உயிரிழந்தனர். இந்த சம்பவத்தைத் தொடர்ந்து, குவாரியின் உரிமம் ரத்து செய்யப்பட்டது. இந்நிலையில், மீண்டும் குவாரியைத் திறக்க அனுமதி கோரி விண்ணப்பிக்கப்பட்டதன் அடிப்படையில், இன்று பொதுமக்கள் கருத்துக்கேட்பு கூட்டம் நடைபெற்றது.
*"மூன்று குவாரிகளும் இயங்குகிறதா?"
கூட்டத்தில் பேசிய சுற்றுச்சூழல் ஆர்வலர் முத்துராமன், குவாரி நிர்வாகம் சமர்ப்பித்த சுற்றுச்சூழல் தாக்க மதிப்பீட்டு அறிக்கையில் (EIA Report) உள்ள முரண்பாடுகளைச் சுட்டிக்காட்டிப் பேசினார்.
"சுற்றுச்சூழல் தாக்க மதிப்பீட்டு அறிக்கையில், 'Baseline Monitoring' மார்ச் 2024 முதல் மே 2024 வரை மேற்கொள்ளப்பட்டதாகக் கூறப்பட்டுள்ளது. இது உண்மையா? மேலும், இந்தச் சுரங்கத்தின் 500 மீட்டர் சுற்றளவில், சங்கரநாராயணன் @ சங்கர், டி. மெர்சி மேரி ஆகியோருக்குச் சொந்தமான மூன்று குவாரிகள் ஏற்கெனவே இயங்கி வருவதாக ('Existing Quarries') அறிக்கையில் குறிப்பிடப்பட்டுள்ளது. இந்த மூன்று குவாரிகளும் தற்போது இயங்கிக்கொண்டுதான் இருக்கின்றனவா?" என்று அதிகாரிகளை நோக்கிக் கேள்வி எழுப்பினார்.
*"பொய்யான தகவல்களைக் கொடுத்து அனுமதி பெற முயற்சி"*
"ஒரு குவாரி விபத்து ஏற்பட்டு மூடப்பட்டிருக்கும் நிலையில், அதைச் சுற்றியுள்ள மற்ற குவாரிகளும் இயங்க வாய்ப்பில்லை. ஆனால், அறிக்கையில் மூன்று குவாரிகள் இயங்குவதாகப் பொய்யான தகவலைக் கொடுத்து, அதன் அடிப்படையில் புதிய குவாரிக்கு அனுமதி பெற முயற்சி நடக்கிறது. இது மக்களை ஏமாற்றும் செயல். இங்குள்ள அதிகாரிகள் இதற்குப் பதிலளிக்க வேண்டும்," என்று முத்துராமன் ஆவேசமாகப் பேசினார்.
*அதிகாரிகளின் மௌனமும், மக்களின் கொந்தளிப்பும்:*
முத்துராமனின் கேள்விகளுக்கு அதிகாரிகள் உரிய பதிலளிக்காததால், கூட்டத்தில் சலசலப்பு ஏற்பட்டது. தொடர்ந்து பேசிய அவர், "ஒரு சுரங்கத்தை எப்படி முறையாக நடத்த வேண்டும் என்ற எந்த விதிமுறைகளையும் பின்பற்றாமல், நான்கு உயிர்கள் பலியாகக் காரணமாக இருந்த ஒரு நிறுவனத்திற்கு, மீண்டும் எப்படி அனுமதி கொடுக்க முடியும்? இந்த அறிக்கை முற்றிலும் தவறானது. அதிகாரிகள் ஒருதலைபட்சமாகச் செயல்படுகிறார்கள்," என்று குற்றம்சாட்டினார்.
இதையடுத்து, கூட்டத்தில் இருந்த பொதுமக்களும், சமூக ஆர்வலர்களும் அதிகாரிகளை நோக்கி சரமாரியாகக் கேள்விகளை எழுப்பி, குவாரிக்கு எதிராகக் கோஷமிட்டதால், கூட்டம் பாதியிலேயே நிறுத்தப்பட்டது. இந்தச் சம்பவம், அப்பகுதியில் பெரும் பரபரப்பை ஏற்படுத்தியுள்ளது.
