திருநெல்வேலி: திருநெல்வேலி மாவட்டம் அம்பாசமுத்திரம் பகுதியில் 6 வயது சிறுவனுக்கு பாலியல் தொல்லை கொடுத்த முதியவருக்கு ஆயுள் தண்டனை மற்றும் அபராதம் விதித்து நெல்லை போக்சோ சிறப்பு நீதிமன்றம் இன்று அதிரடி தீர்ப்பளித்துள்ளது.
சம்பவத்தின் பின்னணி:
அம்பாசமுத்திரம் எழில் நகர் பகுதியைச் சேர்ந்த 6 வயது சிறுவன் ஒருவன், கடந்த 2023-ம் ஆண்டு மே மாதம் தனது வீட்டின் அருகே விளையாடிக் கொண்டிருந்தான். அப்போது அங்குள்ள ஒரு வீட்டின் முன்பு காவலாளியாக வேலை பார்த்து வந்த மேலப்பாளையம் தெருவைச் சேர்ந்த நமசிவாயம் (63) என்பவர், அந்தச் சிறுவனுக்கு பாலியல் ரீதியாக கடும் துன்புறுத்தல் அளித்துள்ளார்.
இது குறித்து சிறுவனின் தந்தை அளித்த புகாரின் பேரில், அம்பாசமுத்திரம் அனைத்து மகளிர் காவல் நிலைய போலீசார் போக்சோ சட்டத்தின் கீழ் வழக்குப் பதிவு செய்து நமசிவாயத்தை கைது செய்தனர்.
நீதிமன்ற விசாரணை:
இந்த வழக்கு நெல்லை போக்சோ சிறப்பு நீதிமன்றத்தில் நீதிபதி திரு. சுரேஷ்குமார் முன்னிலையில் விசாரணைக்கு வந்தது. அரசு தரப்பில் வழக்கறிஞர் திருமதி. உஷா ஆஜராகி வாதிட்டார். இவ்வழக்கில் புதுக்கோட்டை மகளிர் காவல் நிலைய ஆய்வாளர் திருமதி. பாமா பத்மினி மற்றும் அம்பாசமுத்திரம் மகளிர் காவல் நிலைய ஆய்வாளர் திருமதி. வனிதா ஆகியோர் புலனாய்வு அதிகாரிகளாகச் செயல்பட்டு குற்றப்பத்திரிகை தாக்கல் செய்தனர்.
அதிரடி தீர்ப்பு:
வழக்கின் அனைத்து தரப்பு விசாரணைகளும் முடிவடைந்த நிலையில், நமசிவாயம் மீதான குற்றச்சாட்டுகள் சந்தேகத்திற்கு இடமின்றி நிரூபிக்கப்பட்டதையடுத்து நீதிபதி இன்று தீர்ப்பளித்தார்.
குற்றம் சாட்டப்பட்ட நமசிவாயத்திற்கு ஆயுள் தண்டனை மற்றும் 3,000 ரூபாய் அபராதம் விதித்து நீதிபதி உத்தரவிட்டார். மேலும், பாதிக்கப்பட்ட சிறுவனின் எதிர்காலத்தைக் கருத்தில் கொண்டு, தமிழக அரசு சார்பில் அவருக்கு 3,00,000 ரூபாய் (மூன்று லட்சம்) நிதி உதவி வழங்கவும் நீதிமன்றம் பரிந்துரை செய்துள்ளது.
சிறுமிகள் மட்டுமின்றி சிறுவர்களுக்கும் பாலியல் தொல்லை கொடுப்பவர்களுக்கு இத்தகைய கடுமையான தண்டனை வழங்கப்பட்டிருப்பது சமூகத்தில் ஒரு பாடமாக அமையும் என்று சட்ட வல்லுநர்கள் தெரிவித்துள்ளனர்.
