அசுரனுடன் மோதும் ஜி.வி. பிரகாஷ்!

ஜி.வி. பிரகாஷ் நடிப்பில் உருவாகி வெகு நாட்களாக கிடப்பில் கிடக்கும் 100% காதல் படம் தனுஷின் அசுரன் படத்துடன் மோத தயாராகி உள்ளது.

சந்திரமெளலி இயக்கத்தில் ஜி.வி. பிரகாஷ் நடிப்பில் உருவாகியுள்ள 100% காதல் திரைப்படம் கடந்த ஓராண்டாக ரிலீசுக்காக வெயிட்டிங் செய்து வருகிறது. இதே போல, ஜி.வி. பிரகாஷின் ஐங்கரன் படமும் ரிலீசுக்காக காத்திருக்கிறது.

இந்நிலையில், 100% காதல் திரைப்படம் வரும் அக்டோபர் 4ம் தேதி வெளியாகும் என்ற அறிவிப்பை படக்குழு அறிவித்துள்ளது. அன்றைய தினத்தில் தான் வெற்றிமாறன் இயக்கத்தில் தனுஷ், மஞ்சுவாரியர் நடிப்பில் உருவாகியுள்ள அசுரன் படமும் வெளியாகிறது.

அசுரன் படத்தின் முன்னோட்டங்கள் வெளியாகி யூடியூப் டிரெண்டிங்கில் முதலிடம் பிடித்தன. தனுஷ் – வெற்றிமாறன் வெறித்தனமான காம்போ களமிறங்கும் நேரத்தில் ஜி.வி. பிரகாஷ், ஷாலினி பாண்டே நடிப்பில் உருவான 100% காதல் படம் வெளியாவதால், ஜி.வி. பிரகாஷுக்கு தான் சிக்கல் என்று கோலிவுட் வட்டாரங்கள் பேசி வருகின்றன.

இயக்குநர் சசி இயக்கத்தில் சமீபத்தில் வெளியான சிவப்பு மஞ்சள் பச்சை படத்தில் ஜி.வி. பிரகாஷ் நடிப்பு பாராட்டப்பட்டு வரும் நிலையில், அடுத்த படம் எந்த அளவுக்கு வெற்றியை ஈட்டும் என்பது கேள்விக்குறியாகி உள்ளது.