கொரோனா பாதித்த திமுக எம்.எல்.ஏ. அன்பழகன் மரணம்..

கொரோனாவால் பாதிக்கப்பட்டிருந்த திமுக மாவட்டச் செயலாளர் ஜெ.அன்பழகன் இன்று(ஜூன்10) காலை மரணம் அடைந்தார். அவருக்கு வயது 62.சென்னை மேற்கு மாவட்ட திமுக செயலாளராக உள்ள சேப்பாக்கம்-திருவல்லிக்கேணி தொகுதி சட்டமன்ற உறுப்பினர் ஜெ.அன்பழகனுக்குக் கடந்த வாரம் நாட்கள் முன்பாக உடல் நலக் குறைவு ஏற்பட்டது. கொரோனா பரவிய காலத்தில் 62 வயதான இவருக்கு உடல்நலம் குறைந்ததால், கடந்த 2ம் தேதியன்று குரோம்பேட்டையில் உள்ள ரேலா மருத்துவமனையில் சேர்க்கப்பட்டார். உடனடியாக, அவருக்கு கொரோனா பரிசோதனை செய்ததில் கொரோனா தொற்று இருப்பது உறுதியானது.

இதனால், அவரை தீவிர சிகிச்சைப் பிரிவில் வைத்து டாக்டர்கள் சிகிச்சை அளித்து வந்தனர். அவருக்கு மூச்சு விடுவதில் சிரமம் ஏற்பட்டதால், ஆக்சிஜன் தெரபி அளிக்கப்பட்டது. அவருக்கு மூச்சுத்திணறல் ஏற்பட்டதால் வென்டிலேட்டர் பொருத்தப்பட்டது. ஆரம்பத்தில் 80 சதவீதம் அளவுக்கு வென்டிலேட்டர் துணையுடன் சுவாசித்து வந்த அன்பழகன், மறு நாளே 45 சதவீத வென்டிலேட்டர் உதவியுடன் சுவாசிக்கத் தொடங்கினார். அவரது உடல்நிலையில் ஓரளவு முன்னேற்றம் ஏற்பட்டது. ஆனால், நேற்று(ஜூன்9) அவருக்கு மீண்டும் உடல்நிலை மோசமானது.

அன்பழகனின் உடல்நிலை இன்று மிகவும் மோசமடைந்தது. இதையடுத்து, திமுக தலைவர் ஸ்டாலின் உள்ளிட்ட தலைவர்கள் அவசர, அவசரமாக ரேலா மருத்துவமனைக்கு வந்து டாக்டர்களிடம் விசாரித்தனர். இந்நிலையில், காலை 8 மணிக்கு ஜெ.அன்பழகன் உயிரிழந்தார். அவருக்கு இன்று 62வது பிறந்த நாளாகும்.சென்னையில் திமுக முன்னோடிகளில் ஒருவர் பழக்கடை ஜெயராமன். தி.நகரில் பழக்கடை வைத்திருந்தார். இவரது மகன் ஜெ.அன்பழகன், தி.நகர்ப் பகுதிச் செயலாளர், மாவட்டச் செயலாளர் பதவிகளில் இருந்தவர். கடந்த 2001, 2011, 2016 ஆகிய சட்டசபைத் தேர்தல்களில் வெற்றிபெற்று 3 முறை எம்.எல்.ஏ.வாக இருந்தவர். 2001-ல் தி.நகர் தொகுதியிலும் 2006, 2011-ல் சேப்பாக்கம்- திருவல்லிக்கேணி தொகுதியிலும் போட்டியிட்டு எம்.எல்.ஏ.வாக தேர்ந்தெடுக்கப்பட்டவர் என்பது குறிப்பிடத்தக்கது.