சென்னை, கோவை தவிர மற்ற மாவட்டங்களில் கொரோனா பாதிப்பு குறைகிறது..

தமிழகத்தில் புதிதாக கொரோனா பாதிப்பது குறைந்து வருகிறது. நேற்று புதிதாக 455 பேருக்கு மட்டும் தொற்று பாதிக்கப்பட்டது.சீனாவில் இருந்து பரவிய கொரோனா வைரஸ் நோய் இந்தியாவில் இது வரை ஒரு கோடியே 9 லட்சம் பேருக்குப் பாதித்துள்ளது. தமிழ்நாட்டில் கடந்தாண்டு ஏப்ரல் மாதத்தில் பரவிய இந்த வைரஸ் நோய் ஆரம்பத்தில் தினமும் சுமார் 5 ஆயிரம் பேருக்குப் பாதித்தது. தினமும் 100, 200 பேர் இந்த நோய்க்கு பலியாயினர். அக்டோபர் மாதத்திற்குப் பிறகு நோய்ப் பரவுவது குறையத் தொடங்கியது. தற்போது சென்னை, செங்கல்பட்டு, திருவள்ளூர், கோவை உள்பட சில மாவட்டங்களைத் தவிர மற்ற மாவட்டங்களில் பெரிய பாதிப்பு இல்லை.

தமிழக அரசு நேற்று(பிப்.15) மாலை வெளியிட்ட அறிக்கையின்படி, 53 ஆயிரம் பேருக்கு கொரோனா பரிசோதனைகள் செய்ததில் புதிதாக 455 பேருக்குத் தொற்று கண்டறியப்பட்டது. இவர்களையும் சேர்த்து, மாநிலம் முழுவதும் தொற்று பாதிக்கப்பட்டவர்களின் எண்ணிக்கை 8 லட்சத்து 45,575 ஆக உயர்ந்தது.மாநிலம் முழுவதும் மருத்துவமனைகளில் இருந்து நேற்று டிஸ்சார்ஜ் ஆன 477 பேரையும் சேர்த்து, இது வரை 8 லட்சத்து 28,918 பேர் குணம் அடைந்துள்ளனர். நோய்ப் பாதிப்பால் நேற்று 6 பேர் பலியானார்கள்.

இதையடுத்து, பலியானவர்களின் எண்ணிக்கை 12,425 ஆக அதிகரித்துள்ளது. தற்போது சிகிச்சையில் உள்ள கொரோனா நோயாளிகள் எண்ணிக்கை 4232 ஆகக் குறைந்துள்ளது.சென்னை, செங்கல்பட்டு, திருவள்ளூர் மாவட்டங்களிலும், கோவை, திருப்பூர் மாவட்டங்களிலும் புதிதாக கொரோனா பாதிக்கப்படுவது நீடிக்கிறது. சென்னையில் நேற்று புதிதாக 143 பேருக்கும், கோவையில் 46 பேர், செங்கல்பட்டில் 39 பேருக்கும், திருவள்ளூரில் 21 பேர், காஞ்சிபுரத்தில் 20 பேருக்கும், திருப்பூரில் 18 பேருக்கும் கொரோனா தொற்று கண்டறியப்பட்டது. மற்ற மாவட்டங்களில் 15க்கும் குறைவானவர்களுக்கே தொற்று பாதிப்பு உறுதி செய்யப்பட்டது. பெரம்பலூர், புதுக்கோட்டை மாவட்டங்களில் நேற்று புதிய பாதிப்பு எதுவும் இல்லை.