தென்காசி பள்ளி அதிபர் வீட்டில் ஒரு கிலோ நகை, ரூ.20 லட்சம் நகை கொள்ளை... அதிர்ச்சி சம்பவம்
தென்காசி மாவட்டம் ஆலங்குளம் அருகேயுள்ள சாலைப்புதூர் நவநீதகிருஷ்ணபுரத்தைச் சேர்ந்தவர் ராஜசேகரன். இவர் அடைக்கலப்பட்டணம் பகுதியில் மெட்ரிகுலேஷன் பள்ளி, பி.எட். கல்லூரி உள்ளிட்ட கல்வி நிறுவனங்களை நடத்தி வருகிறார். தனது குடும்பத்தினருடன் பள்ளி வளாகத்தில் உள்ள வீட்டில் வசிக்கிறார்.
இந்நிலையில், குடும்பத்தினருடன் திருமண நிகழ்ச்சி ஒன்றில் பங்கேற்பதற்காக ராஜசேகரன் வெளியூர் சென்றிருந்தார். நேற்று காலையில் அவரது வீட்டின் கதவு திறந்து கிடந்தது. வீட்டில் இருந்த பீரோ திறக்கப்பட்டு, ஒரு கிலோ தங்க நகைகள் மற்றும் ரூ.20 லட்சம் திருடப்பட்டுள்ளதாகக் கூறப்படுகிறது.
தகவலறிந்த ஆலங்குளம் போலீஸார் அங்கு சென்று, சோதனை செய்தனர். திருட்டில் ஈடுபட்டது யார், எவ்வளவு நகை, பணம் திருடப்பட்டது என்று விசாரித்து வருகின்றனர். மேலும், தனிப்படைகள் அமைத்து, கொள்ளையர்களை தேடி வருகின்றனர்.