திருநெல்வேலி கனிமவளத்துறை அதிகாரி வீடுகளில் அதிரடி சோதனை: ஓ.டி.பிக்கு கூட 2 ஆயிரம் லஞ்சமா?

திருநெல்வேலி மாவட்ட கனிம வளத்துறை உதவி இயக்குநர் செல்வ சேகரன் மீது எழுந்த சொத்துக் குவிப்பு மற்றும் கனிம வள முறைகேடு புகார்களைத் தொடர்ந்து, தமிழ்நாடு லஞ்ச ஒழிப்புத் துறை அதிகாரிகள் அவரது வீடுகள் மற்றும் அவருக்குத் தொடர்புடைய இடங்களில் இன்று (அக்டோபர் 24) தீவிர அதிரடிச் சோதனை நடத்தி வருகின்றனர்.

திருநெல்வேலி கனிம வளத்துறை உதவி இயக்குநர் செல்வ சேகரனுக்குச் சொந்தமான திருநெல்வேலி* என்.ஜி.ஓ. காலனி வீட்டிலும் திண்டுக்கல், விருதுநகர் வீடுகளிலும் சோதனை நடந்து வருகிறது. கனிம வள முறைகேடுகள் மற்றும் சொத்துக் குவிப்பு குறித்துக் கிடைத்த தகவலின் அடிப்படையில் இந்தச் சோதனை நடைபெற்று வருகிறது. விருதுநகர் மாவட்ட லஞ்ச ஒழிப்புத் துறையினரும் சோதனையில் ஈடுபட்டு வருகின்றனர்.

அதிகாரி செல்வ சேகரன் கோடிக்கணக்கில் சொத்து குவித்திருப்பதாகவும், வருமானத்திற்கு அதிகமாகச் சொத்து சேர்த்திருப்பதாகவும் லஞ்ச ஒழிப்புத்துறைக்கு புகார்கள் வந்துள்ளன. முதற்கட்ட தகவல்களின்படி,

* பல இடங்களில் கால்நடை பண்ணைகள் அமைத்து அதில் முதலீடு செய்திருப்பதாகக் கூறப்படுகிறது.* திண்டுக்கல்லில் பல்வேறு குவாரிகளைப் பினாமி பெயரில் எடுத்து நடத்தி வருவதாகவும் புகார்கள் எழுந்துள்ளன.* எலக்ட்ரிக் ஸ்கூட்டர் ஒன்றின் ஏஜென்சியை எடுத்து மிகப்பெரிய அளவில் வியாபாரம் செய்து வருவதாகவும் தெரிய வந்துள்ளது.* தனது தோழிகளுக்கு திருநெல்வேலி கேடிசி நகரில் ஒன்றே கால் கோடி ரூபாய் மதிப்புள்ள வீடு ஒன்றை வாங்கி கொடுத்திருப்பதாகவும் லஞ்ச ஒழிப்புத்துறைக்கு தகவல் கிடைத்துள்ளது.

ஒரு ஓடிபி-க்கு ரூ. 2000 லஞ்சம்*

கனிமவளத் துறையில் நடை சீட்டு (Permit) வழங்கும்போது, ஒரு முறையான பரிவர்த்தனையில் வரும் ஒரு 'ஓ.டி.பி' (OTP)-க்கு 2000 ரூபாய் வரை இவர் லஞ்சம் வாங்குவதாகப் பல்வேறு புகார்கள் லஞ்ச ஒழிப்புத் துறைக்கு வந்த நிலையில், இந்த அதிரடி சோதனை நடைபெற்று வருகிறது.சோதனையின் முடிவில், சொத்துக்கள் மற்றும் முறைகேடுகள் குறித்த முழுமையான தகவல்கள் அதிகாரபூர்வமாக வெளியிடப்படும் என எதிர்பார்க்கப்படுகிறது.