தமிழ்(அ)ப்பாவுக்கு ஓர் இரங்கற்பா !
---------------------------------------------
யாரும் அறியா அஞ்சுகத்துக்கு
மகனாய்ப் பிறந்து ! !
பாரே அறியும் மகத்தான
தலைவனாய் உயர்ந்து ! !
மன்னவர் பலரை கண்ட
சாம்ராஜ்யங்கள் முன்னே ! !
சாம்ராஜ்யங்கள் பல கண்ட
ஒரே மன்னவன் நீர் தானே ! !
உலகத்துக்கு ஒரே இமயம்
எத்துனை உள்ளங்களில் நீர் இமயம் ! !
வசனத்தால் வசியம் செய்தாய்
வசை பாடியோரும் உன்வசம் செய்தாய் ! !
ஆண்டவன் இல்லையென்று
நாத்திகம் பேசினீரே அன்று ! !
பல உள்ளங்களை ஆண்டவனாய்
மாண்டு போனீரே இன்று ! !
வெடி போல் வரும் விமர்சனங்கள் உன்
பொடி வைத்த பேச்சில் பொசுங்கிடுமே ! !
சிலப்பதிகாரத்தை எளிமையாய் சொன்ன
எழுத்துச்சிற்பியே
சிம்மக்குரலுக்கு எழுத்தால் சிகரம்தந்த
சிந்தனைச்சிற்பியே ! !
காற்றோடு கரைந்திட கற்பூரமா உன்புகழ்
காலம் கடந்த காவியமன்றோ உன்புகழ் ! !
நீர் தலைநிமிர்ந்து ஏற்றிய மூவர்ணக்கொடி
உமக்கு தலைகுனிந்து புகழ் பரப்புதே ! !
செப்புமொழி ஆயிரமாயினும் தமிழை
செம்மொழியாக்கி ஆட்சி கொண்டாய் ! !
வெறும் மையால் இலக்கணம் பிறக்குமா ?.
நீ இல்லா வெறுமையில் இனி தமிழகம் தழைக்குமா?
மெரினா உன் விலாசமல்ல இனி
மெரினாவுக்கே நீர் தான் விலாசம் ! !
- சு.சரவணக்குமார்