கொடநாடு கொலைகள்... எடப்பாடி பழனிசாமி முதல்வர் பதவியில் நீடிக்கக் கூடாது: மு.க.ஸ்டாலின்

கொடநாடு கொலைகள் தொடர்பான தெகல்கா ஆவணப்படத்தை மேற்கோள்காட்டி முதல்வர் எடப்பாடி பழனிசாமி தலைமையிலான அரசு ஒருநிமிடம் கூட பதவியில் நீடிக்கக் கூடாது என திமுக தலைவர் ஸ்டாலின் வலியுறுத்தியுள்ளார்.

இது தொடர்பாக ஸ்டாலின் வெளியிட்டுள்ள அறிக்கை:

2016ம் ஆண்டு செப்டம்பர் 22ம் தேதி போயஸ் கார்டன் வீட்டில் இருந்து அப்போலோ மருத்துவமனைக்குக் கொண்டுச் செல்லப்பட்ட முன்னாள் தமிழக முதலமைச்சர் ஜெயலலிதா, டிசம்பர் 5ம் தேதி மருத்துவமனையிலேயே இறந்ததாக அறிவிக்கப்பட்டது. மருத்துவமனையில் அனுமதிக்கப்பட்டதில் இருந்தே ஜெயலலிதா உடல்நிலை குறித்த மர்மம் தொடங்கியது.

இன்று வரை அந்த மர்மம் விலகவில்லை. ஜெயலலிதாவின் மர்மமான மரணம் குறித்து சிபிஐ விசாரணை நடத்தப்பட வேண்டும் என்று நான் சொல்லி வந்தேன். அப்போது எனது கருத்துக்கு உள்நோக்கம் கற்பித்த அதிமுக அமைச்சர்களே இன்று ஜெயலலிதாவின் மரணத்தில் உள்ள மர்மம் குறித்துப் பேச ஆரம்பித்துள்ளார்கள்.

தமிழக அரசால் அமைக்கப்பட்ட ஆறுமுகசாமி ஆணையம் கூட கண் துடைப்பு நாடகம் தான். சிபிஐ விசாரணை நடத்தினால் தான் மர்மப்படலம் விலகி முழு உண்மை வெளிச்சத்திற்கு வரும்.

இப்படிப்பட்ட சூழ்நிலையில் டெல்லியில் இருந்து வெளியாகியுள்ள “சி டி “ தமிழகத்தையே அதிர்ச்சி அடைய வைத்துள்ளது. ஜெயலலிதாவின் மரணத்தில் மட்டும் மர்மம் இல்லை, மரணத்தைத் தொடர்ந்து பல்வேறு மர்மமான நிகழ்வுகள் நடந்துள்ளன என்பது வெட்ட வெளிச்சம் ஆகி இருக்கிறது.

ஜெயலலிதாவின் மரணத்தில் சசிகலாவும் அவரது குடும்பத்தைச் சேர்ந்த பலரும் எப்படி சந்தேகத்துக்கு ஆளாகியிருக்கிறார்களோ அதைப் போல, அதற்குப் பிறகு நடந்த சம்பவங்களில் இன்றைய முதலமைச்சர் எடப்பாடி பழனிசாமியை நோக்கி சந்தேகக் கணைகள் பாய்ந்துள்ளன. இந்திய அரசியலமைப்புச் சட்டத்தின் படி பதவிப்பிரமாணம் எடுத்துக் கொண்ட முதலமைச்சர் மீது கொலைப்பழி விழுந்துள்ளது.

“தெகல்கா “இதழின் முன்னாள் ஆசிரியர் மாத்யூ தனது புலனாய்வு முயற்சியால் திரட்டி உள்ள தகவல்களை டெல்லியில் வெளியிட்டுள்ளார். அதில் உள்ள தகவல்கள் அதிர்ச்சிக்குரியதாக உள்ளன.

2017ம் ஆண்டு ஏப்ரல் மாதம் 23ம் தேதி கொடநாடு பங்களா சர்ச்சைக்குரிய பகுதியாக மாறியது. அந்த பங்களாவின் காவலாளியாக இருந்த ஓம் பகதூர் என்பவர் மர்மமான முறையில் கொல்லப்பட்டார். அப்போது காவல்துறை தரப்பில் என்ன சொல்லப்பட்டது என்றால், ‘ஓம் பகதூர் சில மர்மமான நபர்களால் கொல்லப்பட்டார் என்றும் கொடநாடு பங்களாவில் இருந்த உயர்ரக கடிகாரங்களும் ஒரு கிரிஸ்டல் பேப்பர் வெயிட்டும் காணாமல் போனது' என்றும் கூறப்பட்டது.

முதலமைச்சராக இருந்தவரின் பங்களாவில் கடிகாரத்தைத் திருட சிறு திருடர்களா உள்ளே நுழைய முடியும் என்று அப்போதே சந்தேகம் எழுப்பப்பட்டது. காவல்துறை எதையோ மறைக்கிறது என்பது மட்டும் தெரிந்தது.

ஓம் பகதூர் மரணத்தைத் தொடர்ந்து அடுத்தடுத்து மரணங்கள் நடந்தன. அவை மரணங்கள் அல்ல, கொலைகள் என்பதைத்தான் டெல்லியில் இருந்து வெளியான தகவல்கள் கூறுகின்றன. ஜெயலலிதாவின் கார் ஓட்டுநரான கனகராஜ், சயன் என்பவரின் மனைவி வினுப்ரியா, இவர்களின் குழந்தை நீத்து, சிசிடிவி ஆபரேட்டரான தினேஷ்குமார் ஆகியோர் அடுத்தடுத்து மரணம் அடைகிறார்கள்.

காவல்துறை விசாரணை நடத்திக்கொண்டு இருக்கும்போதே கனகராஜ் சாலை விபத்தில் மரணம் அடைகிறார். சயன் என்பவரது குடும்பம் சாலை விபத்தில் சிக்குகிறது. அதில் சயன் மட்டுமே உயிரோடு தப்புகிறார். சயனின் மனைவியும் குழந்தையும் இறக்கிறார்கள்.. இந்த சம்பவம் நடந்து இரண்டு மாதங்கள் கழித்து கொடநாடு பங்களாவின் சிசிடிவி ஆபரேட்டரான தினேஷ்குமாரும் இறக்கிறார். இந்தத் தொடர் மரணங்கள் அனைத்தும் ஜெயலலிதா சேர்த்து வைத்திருந்த பணம், சொத்துக்கள், ஆவணங்கள் ஆகியவற்றைக் கைப்பற்றுவதற்காகவே நடந்துள்ளன என்று சந்தேகம் எழுகிறது.

இந்த நிலையில் சயன் அளித்துள்ள வாக்குமூலம் இந்த சந்தேகத்தை உறுதிப்படுத்துகிறது. ஜெயலலிதாவின் கார் ஓட்டுநரான கனகராஜை தனக்கு 4 ஆண்டுகளாகத் தெரியும் என்று சயன் சொல்லி இருக்கிறார். ஜெயலலிதா அப்போலோ மருத்துவமனையில் இருந்தபோது கனராஜ் தன்னை அழைத்ததாகவும் கொடநாடு பங்களாவில் இருந்து சில ஆவணங்களை எடுக்க வேண்டும் என்று சொன்னதாகவும் சயன் என்பவர் சொல்கிறார்.

ஜெயலலிதா மரணம் அடைந்த பிறகு 2017ம் ஆண்டு ஜனவரி, பிப்ரவரி மாதத்தில் கனகராஜ் தன்னை மீண்டும் தொடர்பு கொண்டதாகவும் அந்த ஆவணங்களை கொடநாடு பங்களாவில் இருந்து எடுத்து வர எடப்பாடி பழனிசாமி உத்தரவிட்டுள்ளதாக கனகராஜ் சொன்னதாகவும் சயன் சொல்கிறார். கனகராஜ் தன்னை சென்னைக்கு வரவழைத்து எடப்பாடி பழனிசாமி, செங்கோட்டையன் ஆகியோரை சந்திக்க வைத்தாகவும் சயன் சொல்கிறார்.

கொடநாடு பங்களாவில் இருந்து ஆவணங்களை எடுத்து வர தமிழ்நாட்டைச் சேர்ந்த ஆட்களைப் பயன்படுத்த வேண்டாம் என்றும் கேரளாவைச் சேர்ந்த ஆட்களைப் பயன்படுத்தலாம் என்றும் அதற்கு 5 கோடி ரூபாய் பணம் பேசப்பட்டதாகவும் சயன் சொல்லி இருக்கிறார். சயன் இதனை வீடியோ பேட்டியாகவே கொடுத்துள்ளார்.

இந்த திட்டத்தைச் செயல்படுத்த வாலையார் மனோஜ் என்பவரைப் பயன்படுத்துகிறார்கள். அந்த வாலையார் மனோஜ் அளித்த வீடியோ பேட்டியும் வெளியாகி உள்ளது. கொடநாடு பங்களாவில் 2 ஆயிரம் கோடி ரூபாய் பணம் உள்ளதாக தன்னிடம் கனகராஜும் சயனும் சொன்னதாக வாலையார் மனோஜ் சொல்கிறார். அதனை எடுக்க ஊட்டியில் தங்கி திட்டமிட்டதாகவும் மனோஜ் சொல்கிறார்.

எடப்பாடி பழனிசாமி சொல்லித்தான் இதனை எடுக்கத் திட்டமிடுவதாக கனகராஜும் சயனும் சொன்னதாக மனோஜ் சொல்கிறார். கனகராஜ், ஜம்ஷீர், மனோஜ், சயன் ஆகிய நால்வரும் கொடநாடு பங்களாவுக்குள் சென்றுள்ளார்கள். இதில் ஜம்ஷீர் என்பவருக்கு மட்டும் எதற்குச் செல்கிறோம் என்று தெரியாது. அந்த பங்களாவில் எந்த இடத்தில் ஜன்னல்கள் இருக்கிறது, எந்த ஜன்னல்களில் மரம் மற்றும் இரும்பு தடுப்பு இருக்காது என்பதை கனகராஜ் சொன்னதாகவும் இவர்கள் சொல்லி இருக்கிறார்கள்.

மனோஜ் உள்ளிட்டோர் பணத்தை எடுத்துக் கொண்டு இருக்க சயன் ஏதோ ஆவணங்களைத் தேடிக்கொண்டு இருந்ததாக மனோஜ் சொல்கிறார். இந்த திருட்டு நடக்கும்போது அங்குள்ள 28 சிசிடிவி கேமராக்களும் இயங்காது என்று கனகராஜ் சொல்லி இருக்கிறார். அதன்பிறகு திட்டமிட்டு இந்த திருட்டு நடந்துள்ளது.

இந்த விவகாரம் தினேஷ் குமாருக்குத் தெரியும். இந்த நிலையில் தினேஷ்குமார் மர்மமான முறையில் தற்கொலை செய்து கொண்டார். இந்த தற்கொலையில் மர்மம் இருக்கிறது. ஜெயலலிதா மருத்துவமனையில் இருந்தபோதும், அதன்பிறகும் நடந்த இந்த கொள்ளை மற்றும் கொலைகள் மர்மம் நிறைந்ததாகவும் முதலமைச்சர் எடப்பாடி பழனிசாமியைக் குற்றம் சாட்டுவதாகவும் உள்ளது.

பத்திரிக்கையாளர் மாத்யூ, சயன், மனோஜ் ஆகியோர் அளித்த பேட்டிகள் குறித்து தமிழ்நாடு முதலமைச்சர் எடப்பாடி பழனிசாமி நாட்டு மக்களுக்கு உடனடியாக விளக்கம் சொல்ல வேண்டும். இந்த மூவர் பேட்டி குறித்து, அரசியலுக்குப் பயன்படுத்திக் கொள்ள எண்ணாமல், மத்திய அரசு சிபிஐ மூலம் விசாரணை நடத்த வேண்டும். முதலமைச்சர் எடுத்துக்கொண்ட பதவிப்பிரமாணத்துக்கு முரணானது இது என்பதால் தமிழக ஆளுநர் இது குறித்து விசாரணை நடத்த வேண்டும்.

இல்லாவிட்டால் சட்டபூர்வமான நடவடிக்கைகளில் திமுக இறங்கும்.ஜெயலலிதாவின் மரணத்தில் சசிகலா குடும்பமும், கொடநாடு கொலை, கொள்ளைகளில் எடப்பாடி பழனிசாமியும் ஈடுபட்டு ஒருவரை ஒருவர் மிரட்டிக் கொண்டு இருக்கிறார்கள். அதனால் தான் இவர்கள் மயான மவுனம் காத்து வருகிறார்கள்.

அதிமுக இப்போது இரண்டு பிரிவாக இருக்கிறது. அவர்கள் ஒருவருக்கொருவர் குற்றம் சாட்டிக் கொண்டு இருக்கிறார்கள். ஆனால் ஜெயலலிதா மருத்துவமனைக்குச் சென்றதில் இருந்து ஆட்சியிலும் கட்சியிலும் குடும்பத்திலும் நடந்த அனைத்தும் மர்மமாகவே இருக்கிறது. இந்த மர்மத்தை உடைத்து உண்மைகளை நாட்டுக்குச் சொல்ல வேண்டிய கடமை மத்திய அரசுக்கு இருக்கிறது.இதனை கிரிமினல் கேபினெட் என்று சொல்லி வந்தேன். ஊழல் முறைகேடுகளை வைத்து அப்படிச் சொன்னேன். இப்போது கொலைகள் கொள்ளைகள் குறித்துத் தகவல்கள் வருகின்றன.

இந்தக் குற்றவாளிகளின் அரசு ஒரு நிமிடம் கூட பதவியில் நீடிக்கக் கூடாது முதல்வர் உடனடியாக பதவி விலக வேண்டும் எனக் கேட்டுக் கொள்கிறேன். சட்டத்தின் நீண்ட கரங்கள் கொலைகாரர்களையும், கொள்ளைக்காரர்களையும் வளைத்துக் கடுமையாகத் தண்டிக்க வேண்டும். மேலும் தாமதமானால் நீதி மறுக்கப்பட்டு, கொலைகள் - கொள்ளை மர்மங்கள் ஆழப் புதைக்கப்பட்டுவிடும்.

இவ்வாறு ஸ்டாலின் தெரிவித்துள்ளார்.