சரத்பவார் எங்கள் தலைவர்.. பாஜக-என்சிபி கூட்டணி உறுதி.. அஜித்பவார் ட்விட்

by எஸ். எம். கணபதி, Nov 25, 2019, 09:15 AM IST
Share Tweet Whatsapp

சரத்பவார்தான் எங்கள் தலைவர், நான் எப்போதும் என்.சி.பி கட்சியில்தான் இருப்பேன் என்று அஜித்பவார், ட்விட்டரில் கூறியுள்ளார்.

மகாராஷ்டிர அரசியலில் நவ.23ம் தேதி அதிகாலையில் திடீர் திருப்பம் ஏற்பட்டது. சரத்பவாரின் அண்ணன் ஆனந்தராவ் பவாரின் மகனும், என்.சி.பி. கட்சியின் சட்டசபைக் கட்சித் தலைவருமான அஜித்பவார், திடீரென பாஜக பக்கம் தாவினார். அவர் பாஜக அரசு அமைக்க ஆதரவு கடிதம் அளிக்க, பாஜகவை ஆட்சியமைக்குமாறு கோஷ்யாரி அழைத்தார். முதல்வராக தேவேந்திர பட்நாவிஸ் அதிகாலையில் அவசர, அவசரமாக பதவியேற்றார். அஜித்பவார் துணை முதல்வராக பதவியேற்றார்.

இதனால், அன்று அதிகாலை முதல் அம்மாநில அரசியல் களம் மிகவும் பரபரப்பாக காணப்பட்டு வருகிறது. சிவசேனா தலைமையில் என்.சி.பி, காங்கிரஸ் கூட்டணி ஆட்சி அமைக்கப்படும் என்றும் உத்தவ் தாக்கரே முதல்வராவார் என்றும் சரத்பவார் அதற்கு முதல்நாள்தான் வெளிப்படையாக தெரிவித்திருந்தார்.

ஆனால், நள்ளிரவில் எல்லாமே மாறி விட்டது. நவ.24 அதிகாலை 5.45 மணிக்கு ஜனாதிபதி ஆட்சி விலக்கிக் கொள்ளப்பட்டது. அதைத் தொடர்ந்து, காலை 8 மணிக்கு முதலமைச்சராக தேவேந்திர பட்நாவிஸ், துணை முதல்வராக அஜித்பவார் பதவியேற்றனர். விடிவதற்குள் பாஜக ஆட்சி அமைந்தது எல்லோருக்குமே ஆச்சரியத்தை அளித்தது.

இந்நிலையில், கவர்னரின் செயலை எதிர்த்து சிவசேனா, என்.சி.பி. மற்றும் காங்கிரஸ் சார்பில் உச்ச நீதிமன்றத்தில் வழக்கு தொடரப்பட்டுள்ளது. இன்று(நவ.25) அந்த வழக்கு விசாரிக்கப்படுகிறது. இதற்கிடையே, அஜித்பவார் தனது ட்விட்டர் பக்கத்தில் வெளியிட்ட பதிவு வருமாறு:

நான் என்.சி.பி. கட்சியில்தான் இருக்கிறேன். எப்போதும் என்.சி.பி. கட்சியில்தான் இருப்பேன். எங்களுக்கு சரத்பவார்தான் தலைவர்.

எங்கள் பாஜக-என்.சி.பி. ஆட்சி, மகாராஷ்டிராவில் 5 ஆண்டுகளுக்கு நிலையான ஆட்சியைத் தரும். இந்த ஆட்சி மகாராஷ்டிரா மாநில நலனுக்காகவும், மக்கள் நலனுக்காகவும் உறுதியாக செயல்படும்.

இவ்வாறு அவர் பதிவு செய்திருக்கிறார்.


Leave a reply