இருளர் சமூகத்த சேர்ந்த இளம் பெண்கள் சாலையில் நடந்து சென்றபோது கணவன் கண் எதிரே பாலியல் துன்புறுத்தலில் ஈடுபட்ட நபர்களை காவல் துறையினர் கைது செய்துள்ளனர்.
திருவள்ளூர் மாவட்டம் திருபெரும் புதூரை பூர்வீகமாக கொண்ட குமார், மீனா (24) (பெயர்கள் மாற்றப்பட்டுள்ளன) ஆகியோர் பிழைப்பிற்காக திருவள்ளூர் அருகில் உள்ள ஒரு கிராமத்தில் தற்காலிகமாக குடியேறியுள்ளனர்.
பிப்ரவரி 4ஆம் தேதி அன்று தனது உறவினர் வீட்டிற்கு கணவன், மனைவி இருவரும் மாலை சுமார் 3 மணியளவில் நடந்து சென்றுள்ளனர். அப்போது வேம்பேடு கூட்டுச்சாலையில் உள்ள அரசு மதுபான கடையை கடந்து சென்ற போது அங்கு மது அருந்திக் கொண்டிருந்த 5 வாலிபர்கள் இருளர் சமூகத்தை சேர்ந்த இளம்பெண் மீனாவை கேலி செய்துள்ளனர்.
இதைக் கண்ட அவரது கணவர் குமார் அந்த இடத்தை கடக்க முயன்றபோது இருவரையும் விரட்டிச் சென்ற அந்த கும்பல் இளம் பெண்ணை சுற்றி வளைத்து பாலியல் துண்புறுத்தலில் ஈடுபட்டது. மேலும், அப்பெண்ணின் சுடிதார் மற்றும் உள்ளாடைகள் கிழிக்கப்பட்டுள்ளது.
இந்நிலையில் படுகாயத்துடன் மீனா திருவள்ளூர் அரசு மருத்துவமனையில் அனுமதிக்கப்பட்டு சிகிச்சை பெற்று வருகிறார். மனைவியை காப்பாற்ற முயன்ற கணவனையும், உதவிக்கு வந்து அந்த பகுதியை சேர்ந்த முரளி என்பவரையும் கடுமையாக தாக்கியுள்ளனர்.
இதனையடுத்து அப்பகுதி பொது மக்கள் மதன் குமார் (28), விஜயகுமார் (26), ருத்ரமூர்த்தி (21), ஏழுமலை (23) ஆகியோரை பிடித்து வைத்துள்ளனர். இது குறித்து பெரியபாளையம் காவல் நிலையத்திற்கு தகவல் தெரிந்து சம்பவ இடத்திற்கு சென்று அவர்களை கைது செய்துள்ளனர்.
