மாயா, மாநகரம் படங்களை தொடர்ந்து பொட்டென்ஷியல் ஸ்டூடியோஸ் தயாரிக்கும் புதிய படத்தில், எஸ்.ஜே. சூர்யா கதாநாயகனாக நடித்து வருகிறார். இப்படத்தின் டைட்டில் மற்றும் மோஷன் போஸ்டரை படக்குழுவினர் நேற்று வெளியிட்டனர். ‘மான்ஸ்டர்’ என பெயரிடப்பட்டுள்ள இப்படத்தை ‘ஒரு நாள் கூத்து’ படத்தை இயக்கிய நெல்சன் வெங்கடேசன் இயக்குகிறார்.
இயக்குநராக அறிமுகமான எஸ்.ஜே. சூர்யா பின்னர் ஹீரோவாக உருவாகினார். ஆனால், சில படங்களை தவிர அவருக்கு பல படங்கள் தோல்வியை தந்ததால், சற்று காலம் ஒதுங்கியிருந்தார். சமீபத்தில், வெளியான ஸ்பைடர் மற்றும் மெர்சல் படங்களில் வில்லன் அவதாரம் எடுத்த எஸ்.ஜே.சூர்யாவுக்கு மீண்டும் ஹீரோ சான்ஸ் கிடைத்து வருகிறது. அவரது நடிப்பில், உருவான ‘நெஞ்சம் மறப்பதில்லை’, ‘இறவாக் காலம்’ படங்கள் தயாராகி வெகு நாட்களான பின்னரும், ரிலீஸாகாமல் கிடப்பில் போடப்பட்டிருக்கிறது.
இந்நிலையில், ’ஒரு நாள் கூத்து’ படத்தை இயக்கிய நெல்சன் வெங்கடேசன் இயக்கத்தில் ‘மான்ஸ்டர்’ என்ற படத்தில் எஸ்.ஜே.சூர்யா ஹீரோவாக நடித்து வருகிறார். இப்படத்தில் இவருக்கு ஜோடியாக ’மேயாதமான்’, ‘கடைக்குட்டி சிங்கம்’ படத்தில் நடித்த நடிகை ப்ரியா பவானி சங்கர் நடித்து வருகிறார்.
எலி தான் மான்ஸ்டர்?
எஸ்.ஜே.சூர்யா ஹீரோவாக இருந்தபோதும், படத்தில் ஒரு எலிக்குத் தான் முக்கியத்துவமாம். ஸ்டுவர்ட் லிட்டில் என்ற ஹாலிவுட் படம் போல, எலியை மையப்படுத்தி படம் எடுக்கப்பட்டு வருகிறதாம். படத்தின் இறுதிக் கட்ட படப்பிடிப்பு நடந்து வருவதால், படத்தை புரமோட் செய்ய, மோஷன் போஸ்ட்டரையும் டைட்டிலையும் தயாரிப்பு நிறுவனமான பொட்டென்ஷியல் ஸ்டூடியோஸ் நேற்று மாலை அறிவித்தனர்.
