4 தொகுதி இடைத்தேர்தல்; மு.க.ஸ்டாலின், எடப்பாடி பழனிச்சாமி, டிடிவி தினகரன் இன்று பிரச்சாரம்
இடைத்தேர்தல் நடைபெறும் 4 தொகுதி இடைத்தேர்தலுக்கான பிரச்சாரம் களை கட்டத் தொடங்கி விட்டது.. திமுக தலைவர் மு.க.ஸ்டாலின், அதிமுக சார்பில் முதல்வர் எடப்பாடி பழனிச்சாம், அமமுக பொதுச் செயலாளர் டிடிவி தினகரன் ஆகியோர் இன்று முதல் பிரச்சாரத்தை தொடங்குகின்றனர்.
மே 19-ந் தேதி நடைபெற உள்ள திருப்பரங்குன்றம், ஒட்டப்பிடாரம், அரவக்குறிச்சி, சூலூர் ஆகிய 4 தொகுதி இடைத்தேர்தலுக்கான வேட்பு மனுத்தாக்கல் நிறைவடைந்த நிலையில் தேர்தல் பிரச்சாரம் சூடு பிடிக்கத் தொடங்கி விட்டது. திமுக தலைவர் மு.க.ஸ்டாலின் இன்றும், நாளையும், ஒட்டப்பிடாரம் தொகுதியில் பிரச்சாரம் செய்வார் என்று அறிவிக்கப்பட்ட நிலையில், நேற்று மாலையே அத்தொகுதியில் திண்ணைப் பிரச்சாரத்தில் இறங்கி விட்டார்.ஒட்டப்பிடாரத்தில் கனிமொழி உள்ளிட்ட கட்சி நிர்வாகிகளுடன் நடந்து சென்றபடி திமுக வேட்பாளர் சின்னையாவுக்கு ஆதரவாக வாக்கு சேகரித்த ஸ்டாலின், ஆங்காங்கே திண்ணைப் பிரச்சாரத்திலும் ஈடுபட்டார்.
இன்றும் நாளையும், ஒட்டப்பிடாரம் தொகுதியில் கிராமம் , கிராமமாக சென்று மு.க.ஸ்டாலின் தீவிர வாக்கு சேகரிக்க உள்ளார். இரண்டாம் கட்டமாக இத் தொகுதியில் மே 14-ந் தேதி மு.க.ஸ்டாலின் மீண்டும் இங்கு பிரச்சாரம் செய்யுவுள்ளார்.
மே 3 , 4-ந் தேதி மற்றும் மே 15-ந் தேதி திருப்பரங்குன்றம் தொகுதியிலும்,மே 5, 6 மற்றும் 16-ந் தேதிகளில் சூலூர் தொகுதியிலும்,
மே 7, 8 மற்றும் 17-ந் தேதிகளில் அரவக்குறிச்சி தொகுதியிலும் இரு கட்டங்களாக மு.க.ஸ்டாலின் பிரச்சாரம் செய்யவுள்ளார்.
இதே போல் அதிமுக வேட்பாளர்களை ஆதரித்து முதல்வர் எடப்பாடி பழனிச்சாமியும் இன்று முதல் பிரச்சாரத்தை தொடங்குகிறார். சூலூர் தொகுதி அதிமுக வேட்பாளரை ஆதரித்து எடப்பாடி பழனிச்சாமி பிரச்சாரம் செய்கிறார்.
இதே போல் அம்மா மக்கள் முன்னேற்றக் கழக வேட்பாளர்களை ஆதரித்து அக்கட்சியின் பொதுச் செயலாளர் டிடிவி தினகரனும் இன்று முதல் பிரச்சாரத்தை தொடங்குகிறார். திருப்பரங்குன்றம் தொகுதியில் அமமுக வேட்பாளருக்கு இன்று ஆதரவு திரட்டும் டிடிவி தினகரன், தொடர்ந்து 16 நாட்களுக்கு ஒவ்வொரு தொகுதியிலும் இரு கட்டங்களாக தலா 4 நாட்கள் பிரச்சாரம் செய்கிறார் டிடிவி தினகரன்.
மக்கள் நீதி மய்யம் கட்சித் தலைவர் கமலஹாசன் வரும் 3-ந்தேதி முதல் பிரச்சாரத்தை தொடங்கும் நிலையில் 4 தொகுதி இடைத்தேர்தல் களம் களை கட்டுகிறது.
