அதிமுக -பாஜக கூட்டணி இருக்கிறதா, இல்லையா? இடைத்தேர்தல் தடுமாற்றங்கள்..

by எஸ். எம். கணபதி, Oct 1, 2019, 12:31 PM IST

அதிமுக கூட்டணியில் பாஜக இருக்கிறதா, இல்லையா என்ற குழப்பம் இன்னும் தீர்ந்தபாடில்லை. இரு கட்சித் தலைவர்களும் மாறி, மாறிப் பேசி வருவதால் குழப்பம் நீடிக்கிறது.

விக்கிரவாண்டி, நாங்குனேரி சட்டமன்றத் தொகுதிகளுக்கான இடைத்தேர்தல் வரும் 21ம் தேதி நடைபெறவுள்ளது. இந்த 2 தொகுதிகளிலும் அதிமுக போட்டியிடுகிறது. திமுக அணியில் விக்கிரவாண்டியில் திமுகவும், நாங்குனேரியில் காங்கிரசும் போட்டியிடுகின்றன.

நாடாளுமன்றத் தேர்தலில் அதிமுக கூட்டணியில் இருந்த தேமுதிக, பாமக, தமாகா, சமக உள்ளிட்ட கட்சிகள் இந்த இடைத்தேர்தல்களில் அதிமுகவுக்கு ஆதரவு தெரிவித்து விட்டன. ஆனால், பாஜக ஆதரவு தருவதில், அக்கட்சித் தலைவர்கள் மாறி மாறிப் பேசி வருகிறார்கள். காரணம், தேமுதிக தலைவர் விஜயகாந்தை அமைச்சர்கள் திண்டுக்கல் சீனிவாசன், தங்கமணி, ஜெயக்குமார் ஆகியோர் நேரில் சந்தித்து ஆதரவு கோரினார்கள். அதேசமயம், பாஜகவையும், புதிய தமிழகத்தையும் அதிமுகவினர் கண்டுகொள்ளவில்லை.

இந்த சூழ்நிலையில்தான், முன்னாள் மத்திய அமைச்சர் பொன்.ராதாகிருஷ்ணன், காஞ்சிபுரத்தில் பேட்டியளித்த போது, இந்த இடைத்தேர்தலில் பாஜக போட்டியிடுவது குறித்து கட்சித் தலைமை முடிவு செய்யும் என்றார். அதற்கு பிறகு ஒரு நாள், திருச்செந்தூரில் பேட்டியளித்த போது அவரே, அதிமுகவுடன் கூட்டணி நீடிக்கிறது. இடைத்தேர்தல்களில் அதிமுக வெற்றி பெறும் என்றார்.

அதன்பின்பு, தி இந்து பத்திரிகைக்கு அளித்த பேட்டியில், எங்கள் கட்சித் தலைவர்கள் யாரையும் சந்தித்து, அதிமுக ஆதரவு கேட்கவே இல்லை. நாங்கள் எங்கள் கட்சித் தலைமை என்ன சொல்கிறதோ, அதற்கு கட்டுப்படுவோம் என்றார்.

இதற்கிடையே, ஓமலூரில் நிகழ்ச்சி ஒன்றில் பேசிய முதல்வர் எடப்பாடி பழனிச்சாமி, பாஜகவுக்கு இங்கே மாநில தலைவர் யாரும் இல்லை. அதனால், அவர்களிடம் நேரில் போய் ஆதரவு கேட்க வாய்ப்பில்லை. ஆனால், அதிமுக கூட்டணியில்தான் பாஜக இருக்கிறது என்றார்.

அதேசமயம், துணை முதல்வர் ஓ.பன்னீர்செல்வத்திடம், பாஜகவை பிரச்சாரத்திற்கு அழைக்கவில்லையா? என்று நிருபர்கள் கேட்டதற்கு பதிலளிக்காமல் மழுப்பி விட்டு சென்றார். மேலும், நாங்குனேரியில் நடந்த அதிமுக தேர்தல் பணிக்குழு கூட்டத்தில் அமைச்சர் திண்டுக்கல் சீனிவாசன் பேசும் போது, வேலூர் தொகுதியில் அதிமுக தோற்றதற்கு காரணமே, பாஜகவினர் முத்தலாக் சட்டத்தை கொண்டு வந்ததுதான். அவர்களால்தான் சிறுபான்மையினரின் வாக்குகள் கிடைக்கவில்லை என்று கூறியிருக்கிறார்.

ஆக, மொத்தத்தில் பாஜகவினர் வந்து பிரச்சாரம் செய்தால், நாங்குனேரி தொகுதியில் கிறிஸ்தவ நாடார் இனத்தவரின் வாக்குகள் அதிமுகவுக்கு கிடைக்காமல் போய் விடும் என்று அக்கட்சி பயப்படுவது நன்றாக தெரிகிறது. ஆனாலும், அதிமுகவினர் பாஜகவை கூட்டணியில் இருந்து பிரிக்க முடியாமல் பயத்துடன் சமாளிக்கிறார்கள்.

கடைசியாக, திருமழிசையில் ஓ.பன்னீர்செல்வம் நேற்று பேட்டியளித்த போது, அதிமுக கூட்டணியில் பாஜக இருக்கிறது என்று தெரிவித்தார். பாஜக முன்னாள் மத்திய அமைச்சர் பொன்.ராதாகிருஷ்ணனோ இன்று(அக்.1) சென்னை விமான நிலையத்தில் அளித்த பேட்டியில், அதிமுகவுக்கு இடைத்தேர்தலில் ஆதரவு தருவது பற்றி, எங்கள் கட்சித் தலைமை முடிவு செய்யும் என்றார்.

எப்படியோ, வரும் 21ம் தேதி இடைத்தேர்தல் முடியும் வரை அதிமுக கூட்டணியில்் பாஜக வரும்... ஆனா, வராது...


Speed News

  • சமயத் தலைவர்களுடன் 

    தலைமை செயலர் ஆலோசனை

    கொரோனா ஊரடங்கு கட்டுப்பாடுகள் தளர்த்தப்பட்ட நிலையில், வரும் 6ம் தேதி முதல் வழிபாட்டுத் தலங்களை திறக்கலாம் என்று மத்திய அரசு அறிவித்துள்ளது. தமிழகத்தில் இது தொடர்பாக முடிவெடுப்பதற்காக இன்று மாலை 4.45 மணியவில் ஆலோசனைக் கூட்டம் நடைபெற்றது. தலைமைச் செயலகத்தில் பல்வேறு சமயத் தலைவர்களுடன் இன்று மாலை நடக்கும் கூட்டத்தில் தலைமைச் செயலாளர் சண்முகம் ஆலோசனை நடத்தவுள்ளார். 

    Jun 3, 2020, 14:46 PM IST
  • சென்னை ராயபுரத்தில் 
    3 ஆயிரம் பேருக்கு கொரோனா
     
    சென்னையில் இது வரை 16,585 பேருக்கு கொரோனா பாதித்துள்ளது. குறிப்பாக, ராயபுரம் மண்டலத்தில்  3,060 பேருக்கு கொரோனா தொற்று உறுதி செய்யப்பட்டுள்ளது. மற்ற மண்டலங்களில் பாதிப்பு வருமாறு:   கோடம்பாக்கம் - 1,921, தண்டையார்பேட்டை -  2,007, திரு.வி.க.நகர் -  1,711, தேனாம்பேட்டை - 1,871, அண்ணாநகர் - 1,411, வளசரவாக்கம் -  910, அடையாறு - 949, அம்பத்தூர் - 619, திருவொற்றியூர் - 559, மாதவரம் - 400, மணலி - 228, பெருங்குடி - 278
    ஆலந்தூர் - 243, சோழிங்கநல்லூர் - 279
     

     
    Jun 3, 2020, 14:42 PM IST
  • டெல்லி அரசில் சம்பளம்

    போட பணம் இல்லை..

    டெல்லி துணை முதல்வர் மணீஷ் சிசோடியா இன்று அளித்த பேட்டியில், ‘‘டெல்லி அரசு ஊழியர்களுக்கு சம்பளம் போடவும், சாதாரணச் செலவுகளுக்கும் மாதம் ரூ.3500 கோடி தேவை. ஆனால், கடந்த 2 மாதங்களாக ஜி.எஸ்.டி வசூல் தலா ரூ.500 கோடி அளவில்தான் உள்ளது. மற்ற வழிகளிலும் ரூ.1735 கோடி வருவாய் மட்டுமே கிடைத்துள்ளது. எனவே, மத்திய அரசாங்கம் டெல்லி அரசுக்கு உடனடியாக ரூ.5 ஆயிரம் கோடி நிதி அளிக்க வேண்டும்’’ என்றார். 

    May 31, 2020, 14:10 PM IST
  • தொழிலாளர்களுக்கு எவ்வளவு

    கொடுத்தீர்கள்.. கபில்சிபல் கேள்வி

     

    காங்கிரஸ் மூத்த தலைவர் கபி்ல் சிபில், பிரதமர் மோடிக்கு ஒரு கேள்வி எழுப்பியுள்ளார். அவர் கூறுகையில், ‘‘பி.எம். கேர் நிதியில் இருந்து இது வரை எத்தனை தொழிலாளர்களுக்கு எவ்வளவு பணம் கொடுத்தீ்ர்கள்? இந்த ஊரடங்கு காலத்தில் பல தொழிலாளர்கள் பலியாகியுள்ளனர். சிலர் ரயிலில் இறந்து்ள்ளார்கள். சில நடக்கும் போது இறந்துள்ளார்கள். சிலர் பசியால் மடிந்துள்ளார்கள். நீங்கள் எவ்வளவு தொகை கொடுத்தீ்ர்கள் என்று பதில் கூற வேண்டும்’’ என்றார்

    May 31, 2020, 14:07 PM IST
  • தெருவுக்கு வாங்கய்யா..

    யஷ்வந்த் சின்கா ட்விட்

    முன்னாள் மத்திய அமைச்சர் யஷ்வந்த் சின்கா இன்று ஒரு ட்விட் பதிவிட்டுள்ளார். அதில், ‘‘ஏழைகளின் துயரங்களை கவனிக்காமல், மத்திய அரசு கண்களையும், காதுகளையும் மூடிக் கொண்டிருக்கும் போது, எதிர்க்கட்சிகள் வெறும் மனுக்களை கொடுத்து கொண்டிருப்பது சரியா? இதற்கு மேலும் வெறும் அறிக்கைகள் எதுவும் பலனளிக்காது. எதிர்க்கட்சிகள் அனைத்தும் தெருவுக்கு வந்து போராட வேண்டும்’’ என்று கூறியுள்ளார். 

    May 23, 2020, 14:18 PM IST