யாருக்கு எத்தனை சீட்? திமுகவில் கலகத்தை தொடங்கிய துரைமுருகன்!

Jan 28, 2019, 17:46 PM IST

லோக்சபா தேர்தலுக்கான தொகுதி பங்கீடு குறித்து பேச்சுவார்த்தை நடத்த துரைமுருகன், ஆர்.எஸ்.பாரதி உள்ளிட்டோர் அடங்கிய குழுவை நியமித்திருக்கிறார் ஸ்டாலின். இந்தமுறை இரட்டை இலக்கத்தில் சீட்டுகளைப் பெற்றுவிட வேண்டும் என காங்கிரஸுக்கு டெல்லியில் இருந்து அழுத்தம் கொடுக்கப்பட்டுள்ளது.

'எங்களுக்கு வேண்டிய தொகுதிகள் கிடைக்கும்' எனத் திருநாவுக்கரசர் நம்பிக்கையோடு இருக்கிறார். ஆனால் துரைமுருகன் உள்ளிட்டோர், 5 சீட் கொடுக்கலாம், அதுவும் ஜி.கே.வாசனை அழைத்து வந்தால் 6 சீட் கொடுக்கலாம் என்ற எண்ண ஓட்டத்தில் இருக்கிறார்களாம். காங்கிரஸ் தலைவர்களோ, பத்து சீட்டுகளையாவது வாங்கிவிட வேண்டும் என உறுதியாக இருக்கிறார்கள்.

மதிமுகவுக்கு மேற்கு மண்டலத்தில் ஒரு சீட்டும் மத்திய மண்டலத்தில் ஒரு சீட்டும் வழங்கும் எண்ணத்தில் இருக்கிறார் ஸ்டாலின். காரணம், பொள்ளாச்சியில் மதிமுகவைச் சேர்ந்த டாக்டர்.கிருஷ்ணன் இரண்டு முறை வெற்றி பெற்றிருக்கிறார். அங்கு ஓரளவுக்கு பம்பரத்துக்கு வாய்ப்பு இருப்பதாக நினைக்கிறார்.

இதைப் பற்றி பொறுப்பாளர்களிடம் பேசியபோது, 'கடந்த சில தேர்தல்களில் மதிமுகவுக்கு பெரிதாக எந்த வெற்றியும் கிடைக்கவில்லை. வாக்கு சதவீதமும் அவர்களுக்கு அதல பாதாளத்தில் இருக்கிறது. ஒரு சீட் கொடுத்தால் கோபித்துக் கொள்வார். இரண்டு சீட் கொடுக்கலாம்' எனக் கூறியிருக்கிறார் மூத்த பொறுப்பாளர் ஒருவர்.

அதேபோல் இரண்டு கம்யூனிஸ்ட்டுகளுக்கும் தலா ஒரு சீட் என்ற முடிவில் இருக்கிறார் ஸ்டாலின். இதிலும் கடைசி நேரத்தில் சண்டை வரலாம் என்கிறார்கள். எப்படிப் பார்த்தாலும் 25 தொகுதிகளில் போட்டியிட வேண்டும் என்பதில் ஸ்டாலின் உறுதியாக இருக்கிறார். இந்த உறுதியால் கடைசிநேரத்தில் கூட்டணியில் குழப்பம் ஏற்படலாம் என்கின்றனர் திமுக தோழமைக் கட்சிகள்.

-அருள் திலீபன்


Speed News

  • உள்நாட்டில் தயாரிக்கப்பட்ட

    11,300 வென்டிலேட்டர்கள் சப்ளை

    கொரோனா சிகிச்சையில் மூச்சு திணறல் உளள நோயாளிகளுக்கு சுவாசிப்பதற்கு வென்டிலேட்டர் தேவைப்படுகிறது. கொரோனா பாதிப்பு அதிகமான நிலையில், வென்டிலேட்டர் தேவையும் அதிகமானது. இதையடுதது, உள்நாட்டிலேயே வென்டிலேட்டர்கள் தயாரிக்கப்பட்டன. 

    இந்நிலையில், உள்நாட்டில் தயாரிக்கப்பட்ட 11,300 வென்டிலேட்டர்கள், மருத்துவமனைகளுக்கு சப்ளை செய்யப்பட்டுள்ளதாக மத்திய சுகாதாரத் துறை அமைச்சர் ஹர்ஷ்வர்தன் தெரிவித்தார். மேலும், 6 கோடி ஹைட்ராக்சி குளோரோகுயின் மாத்திரைகள், ஒரு லட்சம் ஆக்ஸிஜன் சிலிண்டர்கள் சப்ளை செய்யப்பட்டுளளதாகவும் அவர் தெரிவித்தார். 

    Jul 4, 2020, 14:34 PM IST
  • சாத்தான்குளம் வழக்கில் 

    மேலும் 4 பேர் கைது

    சாத்தான்குளம் வியாபாரி ஜெயராஜ், அவரது மகன் பென்னிக்ஸ் ஆகியோர் போலீசாரால் கைது செய்யப்பட்டு சிறையில் இருந்த போது திடீர் மரணம் அடைந்தனர். போலீசார் அவர்களை கொடுமையாக தாக்கியதால்தான், அவர்கள் உயிரிழந்தனர் என்று குற்றம்சாட்டப்படுகிறது. பிரேதப் பரிசோதனை அறிக்கையிலும் அவர்கள் தாக்கப்பட்டிருப்பது உறுதியானது.

    இந்நிலையில், கொலை வழக்கு பதிவு செய்யப்பட்டு இன்ஸ்பெக்டர் ஸ்ரீதர் உள்ளிட்டோர் கைது செய்யப்பட்டனர். இதன் தொடர்ச்சியாக, எஸ்.ஐ.பாலகிருஷ்ணன், தலைமைக் காவலர் முருகன், கான்ஸ்டபிள் முத்துராஜா உள்ளிட்ட 4 பேர் கைது செய்யப்பட்டுள்ளனர். 

    Jul 4, 2020, 14:30 PM IST
  • அமைச்சர் மனைவிக்கு கொரோனா..

    தமிழக கூட்டுறவுத் துறை அமைச்சர் செல்லூர் ராஜுவின் மனைவி ஜெயந்திக்கு கொரோனா பாதித்துள்ளது. இவருக்கு பரிசோதனை செய்ததில், கொரோனா தொற்று உறுதி செய்யப்பட்டதால், தனியார் மருத்துவமனையில் சேர்க்கப்பட்டுள்ளார். அமைச்சர் செல்லூர் ராஜுவு்க்கு பரிசோதனை செய்ததில், அவருக்கு தொற்று ஏற்படவில்லை.

    ஏற்கனவே அமைச்சர் கே.பி.அன்பழகன் மற்றும் அதிமுக, திமுக சட்டமன்ற உறுப்பினர்கள் சிலருக்கு கொரோனா தொற்று பாதித்து மருத்துவமனைகளில் சிகிச்சை பெற்று வருகின்றனர். 

    Jul 4, 2020, 14:26 PM IST
  • மும்பையில் கொரோனாவுக்கு

    நேற்று 36 பேர் உயிரிழப்பு

    நாட்டிலேயே மும்பை, சென்னை, டெல்லி ஆகிய  பெருநகரங்களில்தான் கொரோனா பாதிப்பு அதிகமாக உள்ளது. மும்பையில் நேற்று புதிதாக 903 பேருக்கு கொரோனா தொற்று கண்டறியப்பட்டது. இத்துடன் கொரோனா பாதித்தவர் எண்ணிக்கை 77,197 ஆக உயர்ந்தது. இதில் 44170 பேர் குணம் அடைந்துள்ளனர். நேற்று மட்டும் கொரோனா நோயாளிகள் 36 பேர் பலியாகியுள்ளனர். இதையடுத்து கொரோனா பலி 4514 ஆக உயர்ந்துள்ளது. 

    Jul 1, 2020, 13:53 PM IST
  • டெல்லியில் 87 ஆயிரம் பேருக்கு

    கொரோனா பாதிப்பு

    டெல்லியில் நேற்று புதிதாக 2179 பேருக்கு கொரோனா தொற்று உறுதி செய்யப்பட்டது. இத்துடன் இங்கு கொரோனா பாதித்தவர் எண்ணிக்கை 87,360 ஆக உயர்ந்துள்ளது. இதில் 58,348 பேர் குணம் அடைந்துள்ளனர். நேற்று பலியான 62 பேரையும் சேர்த்து மொத்த உயிரிழப்பு 2741 ஆக உள்ளது.

    Jul 1, 2020, 13:45 PM IST