சாத்தான்குளம் போலீஸ் மீது எப்.ஐ.ஆர். பதிய முகாந்திரம்.. ஐகோர்ட் கிளை கருத்து..

by எஸ். எம். கணபதி, Jun 30, 2020, 13:28 PM IST

ஜெயராஜ், பென்னிக்ஸ் உடல்களில் காயம் இருப்பது பிரேதப் பரிசோதனையில் தெரிய வந்துள்ளதால், சாத்தான்குளம் போலீசார் மீது வழக்குப் பதிவு செய்ய முகாந்திரம் உள்ளது என ஐகோர்ட் கருத்து கூறியுள்ளது.தூத்துக்குடி மாவட்டம், சாத்தான்குளத்தில் செல்போன் கடை நடத்திய ஜெயராஜ், அவரது மகன் பென்னிக்ஸ் ஆகியோரை போலீசார் கைது செய்து கோவில்பட்டி கிளைச் சிறையில் அடைத்தனர். அவர்களும் மறுநாளே மர்மமான முறையில் இறந்தனர். போலீஸ் நிலையத்தில் இருவரையும் போலீசார் கொடூரமாக அடித்து துன்புறுத்தியதால்தான் அவர்கள் மரணம் அடைந்ததாகக் குற்றம் சாட்டப்பட்டு வருகிறது. இந்த சம்பவம் நாடு முழுவதும் பெரும் பரபரப்பை ஏற்படுத்தியுள்ளது.

இந்த சம்பவத்தில் தொடர்புடைய, சாத்தான்குளம் போலீஸ் இன்ஸ்பெக்டர், 2 சப்-இன்ஸ்பெக்டர்கள், 2 ஏட்டுகள் சஸ்பெண்ட் செய்யப்பட்டுள்ளனர். சாத்தான்குளம் காவல் நிலையத்தில் உள்ள அனைத்து காவலர்களும் மாற்றப்பட்டுள்ளனர். இந்த சூழலில், சாத்தான்குளம் போலீஸ் நிலையத்திற்குச் சம்பவம் குறித்து விசாரிப்பதற்காக மாஜிஸ்திரேட் சென்றார். அப்போது போலீஸ் நிலையத்தில் தந்தை மகன் வழக்கு தொடர்பான சில ஆவணங்களை, தூத்துக்குடி கூடுதல் கண்காணிப்பாளர் குமார், டிஎஸ்பி பிரதாபன் ஆகியோரிடம் மாஜிஸ்திரேட் கேட்டார். ஆனால், காவல் நிலையத்தில் உள்ளவர்கள் அவற்றைத் தர மறுத்துள்ளனர். மேலும், மாஜிஸ்திரேட் விசாரித்துக் கொண்டிருந்த போது மகாராஜன் என்ற காவலர் அவரை கடுமையான வார்த்தைகளால் திட்டியதாகக் கூறப்படுகிறது.

இதன்பின், மாஜிஸ்திரேட் விசாரணை குறித்த தனது அறிக்கையை மதுரை ஐகோர்ட் கிளையில் தாக்கல் செய்தார். அந்த அறிக்கையில், ஏ.எஸ்.பி. குமார், டி.எஸ்.பி. பிரதாபன், காவலர் மகாராஜன் ஆகியோரின் நடத்தைகளைக் குறிப்பிட்டிருக்கிறார். குறிப்பாக, மகாராஜன் தன்னை உன்னால் ஒன்றும் புடுங்க முடியாதுடா என்று இழிவாகப் பேசியதாகவே குறிப்பிட்டுள்ளார்.இதைக் கண்டு அதிர்ச்சியடைந்த மதுரை ஐகோர்ட் நீதிபதிகள் ஒரு உத்தரவு பிறப்பித்தனர். அதில், ஏஎஸ்பி குமார் உள்ளிட்ட காவல் துறையினர் மீது நீதிமன்ற அவமதிப்பு வழக்கு எடுத்து, அவர்களை நேரில் ஆஜராக உத்தரவிட்டனர். இதன்படி, ஏ.எஸ்.பி. குமார், டி.எஸ்.பி. பிரதாபன், போலீஸ்காரர் மகாராஜன் ஆகியோர் இன்று காலையில் மதுரை ஐகோர்ட்டில் ஆஜராகினர். நெல்லை சரக டி.ஐ.ஜி பிரவீன்குமார் அபினவ் ஆஜரானார்.அவர்களிடம் விளக்கம் கேட்ட நீதிபதிகள் பின்னர் கூறுகையில், “ஜெயராஜ், பென்னிக்ஸ் ஆகியோர் உடலில் அதிக காயங்கள் இருந்தது பிரேதப் பரிசோதனை அறிக்கையில் தெரிய வந்துள்ளது. எனவே, போலீசார் மீது வழக்குப் பதிவு செய்யும் முகாந்திரம் உள்ளது என்று தெரிவித்தனர்.


Speed News

  • மும்பையில் கொரோனாவுக்கு

    நேற்று 36 பேர் உயிரிழப்பு

    நாட்டிலேயே மும்பை, சென்னை, டெல்லி ஆகிய  பெருநகரங்களில்தான் கொரோனா பாதிப்பு அதிகமாக உள்ளது. மும்பையில் நேற்று புதிதாக 903 பேருக்கு கொரோனா தொற்று கண்டறியப்பட்டது. இத்துடன் கொரோனா பாதித்தவர் எண்ணிக்கை 77,197 ஆக உயர்ந்தது. இதில் 44170 பேர் குணம் அடைந்துள்ளனர். நேற்று மட்டும் கொரோனா நோயாளிகள் 36 பேர் பலியாகியுள்ளனர். இதையடுத்து கொரோனா பலி 4514 ஆக உயர்ந்துள்ளது. 

    Jul 1, 2020, 13:53 PM IST
  • டெல்லியில் 87 ஆயிரம் பேருக்கு

    கொரோனா பாதிப்பு

    டெல்லியில் நேற்று புதிதாக 2179 பேருக்கு கொரோனா தொற்று உறுதி செய்யப்பட்டது. இத்துடன் இங்கு கொரோனா பாதித்தவர் எண்ணிக்கை 87,360 ஆக உயர்ந்துள்ளது. இதில் 58,348 பேர் குணம் அடைந்துள்ளனர். நேற்று பலியான 62 பேரையும் சேர்த்து மொத்த உயிரிழப்பு 2741 ஆக உள்ளது.

    Jul 1, 2020, 13:45 PM IST
  • மகாராஷ்டிராவில் ஒரே நாளில்

    4878 பேருக்கு கொரோனா

    நாட்டிலேயே அதிகபட்சமாக மகாராஷ்டிராவில்தான் கொரோனா பாதித்துள்ளது. நேற்று ஒரே நாளில் 4878 பேருக்கு கொரோனா தொற்று உறுதி செய்யப்பட்டுள்ளது. இது வரை மொத்தம் ஒரு லட்ச்த்து 74,761 பேருக்கு கொரோனா பாதித்திருக்கிறது. இதில் 90,911 பேர் குணம் அடைந்துள்ளனர். இ்ம்மாநிலத்தில் 9 லட்சத்து 66,723 கொரோனா பரிசோதனைகள் செய்யப்பட்டுள்ளது.

    Jul 1, 2020, 13:43 PM IST
  • ராஜஸ்தானில் 18 ஆயிரம் பேருக்கு

    கொரோனா தொற்று பாதிப்பு

    ராஜஸ்தானில் முதல்வர் அசோக் கெலாட் தலைமையில் காங்கிரஸ் ஆட்சி நடைபெறுகிறது. இந்த மாநிலத்தில் நேற்று 354 பேருக்கு கொரோனா தொற்று பாதித்துள்ளது. இது வரை மொத்தம் 18,014 பேருக்கு கொரோனா தொற்று கண்டறியப்பட்டுள்ளது. இது வரை 413 பேர் கொரோனாவால் பலியாகியுள்ளனர். 

    ராஜஸ்தானில் இது வரை 8 லட்சத்து 24,213 கொரோனா பரிசோதனைகள் மேற்கொள்ளப்பட்டுள்ளன. இத்தனை சோதனைகளில் 18 ஆயிரம் பேருக்குத்தான் கொரோனா பரவியிருக்கிறது. ஆனால், தமிழ்நாட்டில் 11 லட்சம் பரிசோதனைகள் செய்ததில் 90 ஆயிரம் பேருக்கு கொரோனா பாதித்துள்ளது. அதே போல், தமிழகத்தில் கொரோனா பலியும் 1200 ஆக உள்ளது. 

    Jul 1, 2020, 13:40 PM IST
  • தந்தை, மகன் மரணம் குறித்த வழக்கு

    சி,பி.சி.ஐ.டி விசாரிக்க உத்தரவு

    சாத்தான்குளம் ஜெயராஜ், அவரது மகன் பென்னிக்ஸ் ஆகியோர் மர்ம மரணம் தொடர்பாக சி.பி.ஐ. விசாரணைக்கு தமிழக அரசு பரிந்துரைத்துள்ளது. இந்நிலையில், இது தொடர்பான வழக்கு மதுரை ஐகோர்ட் கிளையில் இன்று விசாரணைக்கு வந்தது. அப்போது, நீதிபதிகள் கூறுகையில், ‘‘இந்த 2 பேர் மரணம் தொடர்பான தடயங்களை மறைக்க வாய்ப்புள்ளதால்,  வழக்கை சி.பி.ஐ. விசாரிக்கத் தொடங்கும் வரை சி.பி.சி.ஐ.டி. விசாரிக்க வேண்டும்’’ என்று உத்தரவிட்டனர். 

    Jun 30, 2020, 13:33 PM IST