சென்னைக்கு அடுத்தபடியாக, செங்கல்பட்டு மாவட்டத்தில் கொரோனா பாதித்தவர் எண்ணிக்கை 10 ஆயிரத்தைத் தாண்டியுள்ளது. திருவள்ளூர், மதுரை மாவட்டங்களில் 8 ஆயிரம் பேருக்கு மேல் நோய் பாதித்துள்ளது.சீன வைரஸ் நோய் கொரோனா, இந்தியாவில் 10 லட்சம் பேருக்கு மேல் பாதித்துள்ளது. இந்தியாவில் மகாராஷ்டிரா, தமிழகம், டெல்லியில் அதிகமானோருக்கு நோய் பரவியிருக்கிறது. தமிழகத்தில் தினமும் 4 ஆயிரம் பேருக்கு மேல் தொற்று பரவி வருகிறது. உயிரிழப்புகளும் அதிகரித்து வருகிறது.
மாநிலம் முழுவதும் நேற்று(ஜூலை20) 4985 பேருக்கு கொரோனா தொற்று கண்டறியப்பட்டது. இதில் 55 பேர் வெளிநாடுகள் மற்றும் வெளிமாநிலங்களில் இருந்து வந்தவர்கள். நேற்று மாலை நிலவரப்படி தமிழகம் முழுவதும் ஒரு லட்சத்து 75,678 பேருக்கு கொரோனா தொற்று கண்டறியப்பட்டிருக்கிறது.இதில், நேற்று டிஸ்சார்ஜ் ஆன 3861 பேரையும் சேர்த்தால், இது வரை ஒரு லட்சத்து 21,776 பேர் குணம் அடைந்துள்ளனர். நோய்ப் பாதிப்பால் நேற்று மட்டுமே 70 பேர் பலியானார்கள். இவர்களுடன் சேர்த்து இது வரை 2551 பேர் உயிரிழந்துள்ளனர்.
சென்னையில் தினமும் ஆயிரத்திற்கு மேற்பட்டவர்களுக்குத் தொற்று கண்டுபிடிக்கப்படுகிறது. நேற்று 1198 பேருக்கு கொரோனா தொற்று கண்டறியப்பட்டது. சென்னையில் இது வரை மொத்தம் 87,235 பேருக்கு கொரோனா தொற்று பாதித்திருக்கிறது. செங்கல்பட்டில் நேற்று 354 பேருக்கும், காஞ்சிபுரம் 329, மதுரை 106, திருவள்ளூர் 454 பேருக்கும் தொற்று கண்டறியப்பட்டது. செங்கல்பட்டு மாவட்டத்தில் கொரோனா பாதித்தவர் எண்ணிக்கை 10 ஆயிரத்தைத் தாண்டி விட்டது. இம்மாவட்டத்தில் நேற்று வரை 10,027 பேருக்கு கொரோனா தொற்று கண்டறியப்பட்டுள்ளது.
மதுரையில் கொரோனா பாதித்தவர் எண்ணிக்கை 8357 ஆக அதிகரித்துள்ளது. திருவள்ளூர் மாவட்டத்தில் அதை விட அதிகமாக 9424 ஆக உயர்ந்துள்ளது. மேலும், 20 மாவட்டங்களில் 2 ஆயிரம் பேருக்கும் அதிகமானோருக்கு கொரோனா பரவியிருக்கிறது. திருவண்ணாமலை, வேலூர், தேனி, திருச்சி, திருநெல்வேலி, தூத்துக்குடி, தென்காசி, விருதுநகர், கோவை உள்ளிட்ட மாவட்டங்களிலும் நேற்று நூற்றுக்கும் மேற்பட்டோருக்கு கொரோனா தொற்று உறுதி செய்யப்பட்டிருக்கிறது.
