டிசம்பர் 27 ம் தேதி அதிகாலை 5.22 மணிக்கு தனுசு ராசியிலிருந்து மகர ராசிக்கு சனிபகவான் பெயர்ச்சியடைகிறார். காரைக்கால் அருகேயுள்ள திருநள்ளாறு ஸ்ரீ தர்பாரண்யேசுவரர் கோவிலில் சனிப்பெயர்ச்சி விழா நடைபெற உள்ளதையொட்டி பந்தல்கால் முகூர்த்தம் விமரிசையாக நடைபெற்றது. காரைக்கால் மாவட்டம் திருநள்ளாற்றில் ஸ்ரீ பிரணாம்பிகை சமேத ஸ்ரீ தர்பாரண்யேசுவரர் கோவிலில் ஸ்ரீ சனீஸ்வரபகவான் தனி சந்ததி கொண்டு அனுக்கிரஹ மூர்த்தியாக அருள்பாலிக்கிறார். சனிப்பெயர்ச்சி இரண்டரை ஆண்டுகளுக்கு ஒரு முறை நடைபெறுகிறது. அப்போது இக்கோவிலில் திரளான பக்தர்கள் பல்வேறு மாநிலங்களில் இருந்தும் வந்து கலந்து கொண்டு தரிசனம் செய்வர். வரும் டிசம்பர் 27ம் தேதி அதிகாலை 5.22 மணிக்கு தனுசு ராசியிலிருந்து மகர ராசிக்கு சனிபகவான் பெயர்ச்சியடைகிறார்.
அப்போது இக்கோவிலில் சனீஸ்வர பகவானுக்கு சிறப்பு அபிஷேக, அலங்காரம் செய்து சிறப்பு ஆராதனையும் செய்யப்படும். சனிப்பெயர்ச்சி நாள் முதல் தொடர்ந்து 2 மாதங்கள் சனிக்கிழமைகளில் திரளான பக்தர்கள் தரிசனம் செய்வார்கள். சனிப்பெயர்ச்சி விழா தொடங்குவதற்கான பூர்வாங்கப் பணிகளின் தொடக்கமாக பந்தல்கால் முகூர்த்தம் கோவில் வளாகத்தில் நடைபெற்றது. சிவாசார்யர்கள் பந்தல்காலுக்கு அபிஷேக, ஆராதனைகளை செய்து வளாகத்தில் பந்தல்கால் நடப்பட்டது. இந்நிகழ்வில் புதுச்சேரி வேளாண்துறை அமைச்சர் கமலக்கண்ணன், மாவட்ட ஆட்சியர் அர்ஜுன் சர்மா, துணை ஆட்சியரும், கோவில் நிர்வாக அதிகாரியுமான ஆதர்ஷ், தருமபுர ஆதின கட்டளை கந்தசாமி தம்பிரான் சுவாமிகள் உள்ளிட்ட பல பிரமுகர்கள் கலந்துகொண்டனர்.
பின்னர் செய்தியாளர்களிடம் பேசிய அமைச்சர் கமலக்கண்ணன், வழக்கமாக சனிப்பெயர்ச்சி விழாவுக்கு முன்பாக செய்யக்கூடிய பணிகள் போன்று இந்தாண்டும் பணிகள் தொடங்கப்பட்டுள்ளன. தற்போது கொரோனா தொற்றுள்ள காலமாக இருப்பதால், விதிகளுக்கு உட்பட்டு சனிப்பெயர்ச்சி நாளில் தரிசனத்திற்கான வசதிகள் செய்யப்படும். சிறப்பு ரயில், பேருந்து போக்குவரத்துக்கு ஏற்பாடு செய்யப்படும். நளன் தீர்த்தக் குளத்தில் பக்தர்கள் நீராடவும், பக்தர்களுக்கான குடிநீர், உணவு, கழிப்பறை வசதிகள் உள்ளிட்டவையும் சிறந்த முறையில் செய்ய ஏற்பாடுகள் செய்யப்பட்டு வருகின்றன என்றார்.
