நடிகை சனாகான் மற்றும் நடன இயக்குநர் மெல்வின் லூயிஸ் இடையே ஆன காதல் ஒரு வழியில் உறுதியாகியுள்ளது.
சிம்பு நடிப்பில் வெளியான சிலம்பாட்டம் படத்தின் மூலம் நாயகியாக அறிமுகமானவர் சனாகான். தமிழில் அதற்குப் பிறகு இரண்டு படங்களே நடித்தார். தம்பிக்கு எந்த ஊரு, பயணம் படங்களைத் தொடர்ந்து தெலுங்கு, கன்னடம் படங்களில் நடிக்கதொடங்கினார். அப்படியே பாலிவுட் பக்கம் செட்டிலாகிவிட்டார் சனா. சமீபத்தில் கூட இந்தி பிக்பாஸ் நிகழ்ச்சியில் கலந்துகொண்டதன் மூலம் லைம் லைட்டுக்குள் வந்தார் சனாகான்.
இந்நிலையில் தான் அவருக்கும் நடன இயக்குநர் மெல்வின் லூயிஸூக்கும் காதல் வளர்வதாக தகவல்கள் வெளியானது. இதைக் குறித்து இருவருமே எந்தக் கருத்தும் தெரிவிக்காமல் இருந்தனர். இருப்பினும் இருவரைப் பற்றியும் பல செய்திகள் இணையத்தைக் கிறங்கடித்தன. இந்நிலையில் மெர்வின் லூயிஸ் பிறந்தநாளன்று இருவரும் ஒன்றாக இருக்கும் புகைப்படத்தைப் பகிர்ந்து காதலை உறுதி செய்துள்ளார் சனாகான்.
இன்ஸ்டாகிராம் பதிவில் சனாகான், " ஒருவரை இவ்வளவு நேசிக்கமுடியும் என்பதே உன்னை சந்திக்கும் வரை எனக்குத் தெரியாது. ஒவ்வொரு நாளும், ஒவ்வொரு நிமிடமும், ஒவ்வொரு நொடியும் உனக்காக உருகுகிறேன். உன்னிடமிருந்து நிறைய நல்ல விஷயங்களை அனுதினமும் கற்றுக் கொள்கிறேன். உன் மீது நான் கொண்ட அன்பை விவரிக்க வார்த்தைகளோ, காலங்களோ போதாது. நீ என்னோடு இருப்பது எனக்கு பெரிய அதிர்ஷம். என்னைத் தேர்ந்தெடுத்ததற்கு நன்றி. இப்பொழுதும் எப்பொழுதும் உன்னைக் காதலிக்கிறேன். பிறந்த நாள் வாழ்த்துகள் - சனாகான். என் வாழ்க்கையில் நான் செய்தி ஒரு நல்ல செயல் என் இதயத்தை உனக்கு கொடுத்ததுதான்” என்று பகிர்ந்துள்ளார் சனாகான்.
