டென்மார்க் செல்ல கெஜ்ரிவாலுக்கு மத்திய அரசு அனுமதி மறுத்தது ஏன்?

by எஸ். எம். கணபதி, Oct 10, 2019, 09:55 AM IST

டெல்லி முதல்வர் அரவிந்த் கெஜ்ரிவாலுக்கு, டென்மார்க் செல்ல மத்திய அரசு அனுமதி தர மறுத்தது. இதற்கு ஆம் ஆத்மி கட்சி கண்டனம் தெரிவித்த நிலையில், அனுமதி மறுப்புக்கான காரணம் வெளியாகியுள்ளது.

டென்மார்க் நாட்டின் கோபன்ஹேகன் நகரில் சி-40 பருவநிலை மாறுபாடு தொடர்பான சர்வதேச மாநாடு, கடந்த 9ம் தேதி தொடங்கியது. வரும் 12-ம் தேதி வரை இ்ம்மாநாடு நடைபெற உள்ளது. இம்மாநாட்டில் கலந்து கொள்வதற்காக ஆம் ஆத்மி கட்சியின் தலைவரும் டெல்லி முதல்வருமான அரவிந்த் கெஜ்ரிவால், 8 பேர் குழுவுடன் கடந்த 8ம் தேதி டென்மார்க் செல்லவிருந்தார். ஆனால், கடைசி நேரத்தில் அவருக்கு அனுமதி தர மத்திய வெளியுறவு அமைச்சகம் மறுத்து விட்டது.

மாநில முதல்வர்கள், அமைச்சர்கள் அரசு முறைப் பயணமாக வெளிநாடு பயணம் மேற்கொள்ள வேண்டுமென்றால், மத்திய அரசின் அனுமதி கட்டாயமாகும். கெஜ்ரிவாலுக்கு அனுமதி மறுக்கப்பட்டதால், அவரது பயணம் ரத்தானது. மத்திய அரசு மற்ற மாநில முதல்வர்கள், அமைச்சர்களுக்கு வெளிநாடு செல்ல அனுமதி கொடுத்து விட்டு, வேண்டுமென்றே உள்நோக்கத்துடன் கெஜ்ரிவாலுக்கு அனுமதி மறுத்துள்ளது என்று ஆம் ஆத்மி கட்சித் தலைவர்கள, பாஜகவுக்கு கண்டனம் தெரிவித்தனர்.

இந்நிலையில், மத்திய அமைச்சர் பிரகாஷ் ஜவடேகர் நேற்று(அக்.9) கூறுகையில், டென்மார்க்கில் நடைபெறுவது சி-40 பருவநிலை மாறுபாடு தொடர்பான மேயர்கள் மாநாடு. இந்த மாநாட்டில் மிகப் பெரிய ஜனநாயக நாடான இந்தியாவின் தலைநகரின் முதலமைச்சர் கலந்து கொள்வது சரியாக இருக்காது. மேயர்கள்தான் கலந்து கொள்ள வேண்டும். முதலமைச்சர் பங்கேற்பது நாட்டுக்கு பெருமை சேர்க்காது என்பதால், அவர் அனுமதிக்கப்படவில்லை. அதே சமயம், மேற்கு வங்க அமைச்சர் பர்ஹத் ஹக்கீம் அங்கு செல்ல அனுமதிக்கப்பட்டுள்ளார் என்று தெரிவித்தார்.

இது குறித்து ஆம் ஆத்மி தலைவர் ஒருவர் கூறுகையில், மத்திய அரசு வேண்டுமென்றே தான் அனுமதி மறுத்துள்ளது. முதல்வருக்கு பெருமை சேர்க்காது என்று இப்போது சொல்கிறார்கள். ஆனால், டெல்லி அரசுக்கு எந்த அதிகாரமும் தராமல், முதல்வரை கவுன்சிலர் போல்தானே பாஜக அரசு நடத்தியது? டெல்லியில் ஒற்றை, இரட்டை இலக்க எண் அடிப்படையில் வாகனங்களின் இயக்கத்தை குறைத்ததன் மூலம் காற்று மாசு 25 சதவீத அளவுக்கு குறைக்கப்பட்டிருக்கிறது. இது பற்றி மாநாட்டில் விளக்கமாக உரையாற்ற கெஜ்ரிவால் திட்டமிட்டிருந்தார். இது பிடிக்காமல் அவருக்கு அனுமதி மறுத்துள்ளனர்என்றார்.


Speed News

  • டெல்லி அரசில் சம்பளம்

    போட பணம் இல்லை..

    டெல்லி துணை முதல்வர் மணீஷ் சிசோடியா இன்று அளித்த பேட்டியில், ‘‘டெல்லி அரசு ஊழியர்களுக்கு சம்பளம் போடவும், சாதாரணச் செலவுகளுக்கும் மாதம் ரூ.3500 கோடி தேவை. ஆனால், கடந்த 2 மாதங்களாக ஜி.எஸ்.டி வசூல் தலா ரூ.500 கோடி அளவில்தான் உள்ளது. மற்ற வழிகளிலும் ரூ.1735 கோடி வருவாய் மட்டுமே கிடைத்துள்ளது. எனவே, மத்திய அரசாங்கம் டெல்லி அரசுக்கு உடனடியாக ரூ.5 ஆயிரம் கோடி நிதி அளிக்க வேண்டும்’’ என்றார். 

    May 31, 2020, 14:10 PM IST
  • தொழிலாளர்களுக்கு எவ்வளவு

    கொடுத்தீர்கள்.. கபில்சிபல் கேள்வி

     

    காங்கிரஸ் மூத்த தலைவர் கபி்ல் சிபில், பிரதமர் மோடிக்கு ஒரு கேள்வி எழுப்பியுள்ளார். அவர் கூறுகையில், ‘‘பி.எம். கேர் நிதியில் இருந்து இது வரை எத்தனை தொழிலாளர்களுக்கு எவ்வளவு பணம் கொடுத்தீ்ர்கள்? இந்த ஊரடங்கு காலத்தில் பல தொழிலாளர்கள் பலியாகியுள்ளனர். சிலர் ரயிலில் இறந்து்ள்ளார்கள். சில நடக்கும் போது இறந்துள்ளார்கள். சிலர் பசியால் மடிந்துள்ளார்கள். நீங்கள் எவ்வளவு தொகை கொடுத்தீ்ர்கள் என்று பதில் கூற வேண்டும்’’ என்றார்

    May 31, 2020, 14:07 PM IST
  • தெருவுக்கு வாங்கய்யா..

    யஷ்வந்த் சின்கா ட்விட்

    முன்னாள் மத்திய அமைச்சர் யஷ்வந்த் சின்கா இன்று ஒரு ட்விட் பதிவிட்டுள்ளார். அதில், ‘‘ஏழைகளின் துயரங்களை கவனிக்காமல், மத்திய அரசு கண்களையும், காதுகளையும் மூடிக் கொண்டிருக்கும் போது, எதிர்க்கட்சிகள் வெறும் மனுக்களை கொடுத்து கொண்டிருப்பது சரியா? இதற்கு மேலும் வெறும் அறிக்கைகள் எதுவும் பலனளிக்காது. எதிர்க்கட்சிகள் அனைத்தும் தெருவுக்கு வந்து போராட வேண்டும்’’ என்று கூறியுள்ளார். 

    May 23, 2020, 14:18 PM IST
  • சிறப்பு ரயில்கள் வேண்டாம்..

    மேற்கு வங்கம் கோரிக்கை

    மேற்கு வங்கத்தில் அம்பன் புயலால் பெரும் சேதம் ஏற்பட்டுள்ளது. புயல் மழையால் ஏற்பட்ட பாதிப்புகளை சரி செய்யும் நிவாரணப் பணிகளை மேற்கொள்ள வேண்டியுள்ளதால், தற்போது சிறப்பு ரயில்களை இயக்க வேண்டாம் எ்னறு அம்மாநில அரசு கோரியு்ள்ளது. இது தொடர்பாக ரயில்வே வாரியத் தலைவர் வி.கே.யாதவுக்கு தலைமைச் செயலாளர் ராஜு சின்கா கடிதம் அனுப்பியு்ள்ளார், அதில், சிறப்பு ரயிலில் வரும் புலம்பெயர்ந்த தொழிலாளர்களை பரிசோதனைக்கு உள்ளாக்கி, தனிமைப்படுத்துவதற்கு இயலாத சூழல் உள்ளதால், வரும் 26ம் தேதி வரை சிறப்பு ரயில்களை இயக்க வேண்டாம் எ்னறு கோரப்பட்டுள்ளது. 

    May 23, 2020, 13:57 PM IST
  • மகாராஷ்டிராவில் 44 ஆயிரம்

    பேருக்கு கொரோனா பாதிப்பு

    நாட்டிலேயே அதிகபட்சமாக மகாராஷ்டிராவில் 44,582 பேருக்கு கொரோனா தொற்று பரவியிருக்கிறது. இதில், 12,583 பேர் குணமடைந்துள்ளனர். 1517 பேர் இந்நோய்க்கு பலியாகியுள்ளனர். மாநிலத்தில் மும்பையில்தான் அதிகபட்சமாக 27 ஆயிரம் பேருக்கு கொரானா தொற்று பரவியிருக்கிறது.

     

    May 23, 2020, 13:53 PM IST