பாஜகவின் அகந்தையால் மகாராஷ்டிராவில் வாக்குகள் சரிவு.. சிவசேனா கடும் தாக்கு..

by எஸ். எம். கணபதி, Oct 25, 2019, 12:11 PM IST

பாஜகவின் அகந்தையால்தான் மகாராஷ்டிராவில் அக்கட்சியின் வாக்குகள் சரிந்துள்ளது என்று சிவசேனா கட்சியின் அதிகாரப்பூர்வ நாளேடு கடுமையாக விமர்சித்துள்ளது.

மகாராஷ்டிராவில் பாஜக-சிவசேனா கூட்டணி மீண்டும் ஆட்சியைப் பிடித்துள்ளது. ஆனால், கடந்த 2014ம் ஆண்டு தேர்தலில் தனித்தனியாக போட்டியிட்டு பெற்ற அளவுக்கு கூட இடங்களை பெற முடியவில்லை. 2014ம் ஆண்டு தேர்தலில் பாஜக 122 இடங்களையும், சிவசேனா 63 இடங்களையும் கைப்பற்றியிருந்தன. தேர்தலுக்கு பின், இரு கட்சிகளும் இணைந்து கூட்டணி ஆட்சி அமைத்தன. இந்த முறை இரு கட்சிகளும் கூட்டணி அமைத்தும் பாஜக 105 இடங்களிலும், சிவசேனா 56 இடங்களிலும்தான் வெற்றி பெற்றுள்ளன. எனவே, கூட்டணி அமைக்காமல் இருந்தால், காங்கிரஸ்-தேசியவாத காங்கிரஸ் கூட்டணி ஆட்சி அமைந்திருக்கலாம்.

இந்த நிலையில், பாஜகவின் அகங்காரம்தான் வாக்குகள் சரிவுக்கு காரணம் என்றும், எதிர்க்கட்சிகளை முற்றிலுமாக ஒழித்து விட முடியாது என்றும் சிவசேனா கடுமையாக தாக்கியுள்ளது. அந்த கட்சியின் அதிகாரப்பூர்வ நாளேடான சாம்னா பத்திரிகையில் எழுதப்பட்டுள்ள தலையங்கத்தில் கூறப்பட்டிருப்பதாவது:

தேர்தல் நேரத்தில் சரத்பவாரின் தேசியவாத காங்கிரஸ் கட்சியை பாஜக உடைத்தது. அந்த கட்சியில் இருப்பவர்களை இழுத்தது. அதனால், பவாரின் தேசியவாத காங்கிரஸ் அழிந்து விட்டது, இனி அக்கட்சிக்கு எதிர்காலமே இல்லை என்று எல்லோரும் பேசினார்கள். ஆனால், அந்த கட்சி கடந்த முறையை விட அதிக இடங்களை பெற்றிருக்கிறது. 50 தொகுதிகளுக்கு மேல் கைப்பற்றியிருக்கிறது. அரசியலில் என்றுமே எதிர்க்கட்சிகளை ஒழித்து விட முடியாது என்பதை பாஜக புரிந்து கொள்ள வேண்டும்.

சதாரா லோக்சபா தொகுதியில் கடந்த நாடாளுமன்றத் தேர்தலில் தேசியவாத கட்சியின் சார்பில் போட்டியிட்டு பாஜகவை வென்ற உதயன்ராஜே போஸ்லேவை பாஜகவில் சேர்த்தார்கள். அதே தொகுதி இடைத்தேர்தலில் அவரை நிறுத்தினார்கள். ஆனால், மக்கள் அவரை நிராகரித்து மீண்டும் தேசியவாத காங்கிரஸ் வேட்பாளரைத்தானே வெற்றி பெற வைத்தார்கள்? அந்த சதாரா தொகுதிக்கு அமித்ஷாவும், மோடியும் வந்து பெரிய பிரச்சாரம் செய்தார்கள். சத்ரபதி சிவாஜியின் வாரிசு என்று பெருமையாக உதயன்ராஜேவை போற்றினார்கள். ஆனால், சத்ரபதி சிவாஜி பெயரை பயன்படுத்தி அரசியல் சந்தர்ப்பவாதம் செய்வதை மக்கள் ஏற்கவில்லை.

தலைவரே இல்லாத காங்கிரஸ் கட்சியும் 44 இடங்களில் வென்றிருக்கிறது. இதிலிருந்து மக்களின் உணர்வை புரிந்து கொள்ள வேண்டும். பாஜகவின் அதிகார மமதையை, அகங்காரத்தை மக்கள் விரும்பவில்லை.

இவ்வாறு சாம்னா தலையங்கத்தில் கடுமையாக எழுதப்பட்டிருக்கிறது. இந்த பத்திரிகையில் அக்கட்சித் தலைவர் உத்தவ் தாக்கரேவின் கருத்துதான் தலையங்கமாக வெளிவரும் என்பது குறிப்பிடத்தக்கது.


Speed News

  • டெல்லி, மும்பை, சென்னையில்

    கட்டுப்படாத கொரோனா பரவல்

    இந்தியாவில் இது வரை 6 லட்சத்து 97 ஆயிரம் பேருக்கு கொரோனா பரவியிருக்கிறது. குறிப்பாக, டெல்லி, மும்பை, சென்னை ஆகிய பெருநகரங்களில்தான் அதிகமானோருக்கு கொரோனா பரவியிருக்கிறது. 

    டெலலியில் நேற்று 2244 பேருக்கு தொற்று அறியப்பட்ட நிலையில், அங்கு மொத்தம் 99,444 பேருக்கு கொரோனா பரவியிருக்கிறது. சென்னையில் நேற்று 1713 பேருக்கு கொரோனா தொற்று கண்டறியப்பட்ட நிலையில், மொத்தம் 68,254 பேருக்கு கொரோனா பாதித்துள்ளது.  மும்பையில் நேற்று 1311 பேருக்கு கொரோனா தொற்று உறுதியான நிலையில், மொத்தம் 84,125 பேருக்கு பாதித்திருக்கிறது.  

    Jul 6, 2020, 12:49 PM IST
  • உள்நாட்டில் தயாரிக்கப்பட்ட

    11,300 வென்டிலேட்டர்கள் சப்ளை

    கொரோனா சிகிச்சையில் மூச்சு திணறல் உளள நோயாளிகளுக்கு சுவாசிப்பதற்கு வென்டிலேட்டர் தேவைப்படுகிறது. கொரோனா பாதிப்பு அதிகமான நிலையில், வென்டிலேட்டர் தேவையும் அதிகமானது. இதையடுதது, உள்நாட்டிலேயே வென்டிலேட்டர்கள் தயாரிக்கப்பட்டன. 

    இந்நிலையில், உள்நாட்டில் தயாரிக்கப்பட்ட 11,300 வென்டிலேட்டர்கள், மருத்துவமனைகளுக்கு சப்ளை செய்யப்பட்டுள்ளதாக மத்திய சுகாதாரத் துறை அமைச்சர் ஹர்ஷ்வர்தன் தெரிவித்தார். மேலும், 6 கோடி ஹைட்ராக்சி குளோரோகுயின் மாத்திரைகள், ஒரு லட்சம் ஆக்ஸிஜன் சிலிண்டர்கள் சப்ளை செய்யப்பட்டுளளதாகவும் அவர் தெரிவித்தார். 

    Jul 4, 2020, 14:34 PM IST
  • சாத்தான்குளம் வழக்கில் 

    மேலும் 4 பேர் கைது

    சாத்தான்குளம் வியாபாரி ஜெயராஜ், அவரது மகன் பென்னிக்ஸ் ஆகியோர் போலீசாரால் கைது செய்யப்பட்டு சிறையில் இருந்த போது திடீர் மரணம் அடைந்தனர். போலீசார் அவர்களை கொடுமையாக தாக்கியதால்தான், அவர்கள் உயிரிழந்தனர் என்று குற்றம்சாட்டப்படுகிறது. பிரேதப் பரிசோதனை அறிக்கையிலும் அவர்கள் தாக்கப்பட்டிருப்பது உறுதியானது.

    இந்நிலையில், கொலை வழக்கு பதிவு செய்யப்பட்டு இன்ஸ்பெக்டர் ஸ்ரீதர் உள்ளிட்டோர் கைது செய்யப்பட்டனர். இதன் தொடர்ச்சியாக, எஸ்.ஐ.பாலகிருஷ்ணன், தலைமைக் காவலர் முருகன், கான்ஸ்டபிள் முத்துராஜா உள்ளிட்ட 4 பேர் கைது செய்யப்பட்டுள்ளனர். 

    Jul 4, 2020, 14:30 PM IST
  • அமைச்சர் மனைவிக்கு கொரோனா..

    தமிழக கூட்டுறவுத் துறை அமைச்சர் செல்லூர் ராஜுவின் மனைவி ஜெயந்திக்கு கொரோனா பாதித்துள்ளது. இவருக்கு பரிசோதனை செய்ததில், கொரோனா தொற்று உறுதி செய்யப்பட்டதால், தனியார் மருத்துவமனையில் சேர்க்கப்பட்டுள்ளார். அமைச்சர் செல்லூர் ராஜுவு்க்கு பரிசோதனை செய்ததில், அவருக்கு தொற்று ஏற்படவில்லை.

    ஏற்கனவே அமைச்சர் கே.பி.அன்பழகன் மற்றும் அதிமுக, திமுக சட்டமன்ற உறுப்பினர்கள் சிலருக்கு கொரோனா தொற்று பாதித்து மருத்துவமனைகளில் சிகிச்சை பெற்று வருகின்றனர். 

    Jul 4, 2020, 14:26 PM IST
  • மும்பையில் கொரோனாவுக்கு

    நேற்று 36 பேர் உயிரிழப்பு

    நாட்டிலேயே மும்பை, சென்னை, டெல்லி ஆகிய  பெருநகரங்களில்தான் கொரோனா பாதிப்பு அதிகமாக உள்ளது. மும்பையில் நேற்று புதிதாக 903 பேருக்கு கொரோனா தொற்று கண்டறியப்பட்டது. இத்துடன் கொரோனா பாதித்தவர் எண்ணிக்கை 77,197 ஆக உயர்ந்தது. இதில் 44170 பேர் குணம் அடைந்துள்ளனர். நேற்று மட்டும் கொரோனா நோயாளிகள் 36 பேர் பலியாகியுள்ளனர். இதையடுத்து கொரோனா பலி 4514 ஆக உயர்ந்துள்ளது. 

    Jul 1, 2020, 13:53 PM IST