சீனாவில் இருந்து வாங்கு.. ராகுல் கடும் விமர்சனம்

by எஸ். எம். கணபதி, Nov 5, 2019, 09:52 AM IST

இந்தியாவில் உற்பத்தி என்பது இப்போது சீனாவில் இருந்து வாங்கு என்று மாறி விட்டது என மத்திய அரசை ராகுல்காந்தி விமர்சனம் செய்துள்ளார்.

தாய்லாந்து நாட்டில் பிராந்திய விரிவான பொருளாதார ஒப்பந்தம்(ஆர்.சி.இ.பி.) தொடர்பான ஏசியான்-இந்தியா மாநாடு கடந்த 2 நாட்களாக நடைபெற்றது. இந்த மாநாட்டில், 10 ஆசிய நாடுகள் மற்றும் இந்தியா, சீனா உள்பட 6 நாடுகள் பங்கேற்றன.

ஆர்.சி.இ.பி. என்பது இந்த நாடுகள் இடையே தடையற்ற வர்த்தகம் செய்வதற்கான ஒப்பந்தம். இதன்மூலம், எந்த தடையுமின்றி இந்த நாடுகளில் ஏற்றுமதி செய்யலாம்.
ஏற்கனவே சீனாவில் இருந்து இந்தியாவுக்குள் ஏராளமான பொருட்கள் இறக்குமதியாவதால், இந்திய சிறுகுறு நடுத்தரத் தொழில்கள் பலவும் பாதிக்கப்பட்டுள்ளது.

அதனால், ஆர்.சி.இ.பி. ஒப்பந்தத்தில் கையெழுத்திடக் கூடாது என்று இந்திய வர்த்தகர்கள் மத்திய அரசுக்கு அழுத்தம் கொடுத்து வந்தனர். இதன்படி, பிரதமர் மோடியும் அந்த ஒப்பந்தத்தில் இந்தியா கையெழுத்திடாது என்று நேற்று அறிவித்துள்ளார்.

முன்னதாக, இந்தியா அந்த ஒப்பந்தத்தில் கையெழுத்திடும் என்று கருதிய காங்கிரஸ் முன்னாள் தலைவர் ராகுல்காந்தி தனது ட்விட்டர் பக்கத்தில் அதற்கு கண்டனம் தெரிவித்திருந்தார். அதில் அவர், இந்தியாவில் உற்பத்தி(மேக் இன் இந்தியா) என்பது இப்போது சீனாவில் இருந்து வாங்கு(பை பிரம் சீனா) என்று மாறி வருகிறது. ஆண்டுதோறும் ஒவ்வொரு இந்தியனும் சராசரியாக ரூ.6 ஆயிரத்திற்கு சீனா பொருட்களை வாங்குகிறார்கள். கடந்த 2014ம் ஆண்டில் இருந்த சீனா பொருட்கள் இறக்குமதியை விட இப்போது 100 சதவீதம் அதிகமாகியுள்ளது.

ஆர்.சி.இ.பி. மூலம் சீனாவில் இருந்து மலிவு விலை பொருட்கள், இந்தியாவுக்குள் தாராளமாக வந்து விடும். அதன்மூலம், வேலைவாய்ப்புகள் பறிபோகும். நாட்டின் பொருளாதாரம் அழிந்து விடும் என்று கூறியிருந்தார்.

இதற்கு பாஜக தரப்பில் உடனடியாக பதில் தரப்பட்டது. பாஜக ட்விட்டரில், ராகுல்காந்திக்கு தியானத்திற்கு போய் வந்ததும் ஆர்.சி.இ.பி பற்றி நினைவு வந்து விட்டது. கடந்த 2012ம் ஆண்டில் ஐ.மு.கூட்டணி ஆட்சியில்தான், ஆர்.சி.இ.பி. ஒப்பந்த பேச்சுவார்த்தைகள் தொடங்கின. 2005ம் ஆண்டில் சீனாவுடன் வர்த்தக பற்றாக்குறை 1.9 பில்லியன் டாலராக இருந்தது 2014ல் 44.8 பில்லியனாக 23 மடங்கு உயர்ந்து விட்டது. நீங்கள் செய்த தவறுகளை பிரதமர் மோடி சரி செய்து வருகிறார் என்று கூறியுள்ளது.


Speed News

  • டெல்லி, மும்பை, சென்னையில்

    கட்டுப்படாத கொரோனா பரவல்

    இந்தியாவில் இது வரை 6 லட்சத்து 97 ஆயிரம் பேருக்கு கொரோனா பரவியிருக்கிறது. குறிப்பாக, டெல்லி, மும்பை, சென்னை ஆகிய பெருநகரங்களில்தான் அதிகமானோருக்கு கொரோனா பரவியிருக்கிறது. 

    டெலலியில் நேற்று 2244 பேருக்கு தொற்று அறியப்பட்ட நிலையில், அங்கு மொத்தம் 99,444 பேருக்கு கொரோனா பரவியிருக்கிறது. சென்னையில் நேற்று 1713 பேருக்கு கொரோனா தொற்று கண்டறியப்பட்ட நிலையில், மொத்தம் 68,254 பேருக்கு கொரோனா பாதித்துள்ளது.  மும்பையில் நேற்று 1311 பேருக்கு கொரோனா தொற்று உறுதியான நிலையில், மொத்தம் 84,125 பேருக்கு பாதித்திருக்கிறது.  

    Jul 6, 2020, 12:49 PM IST
  • உள்நாட்டில் தயாரிக்கப்பட்ட

    11,300 வென்டிலேட்டர்கள் சப்ளை

    கொரோனா சிகிச்சையில் மூச்சு திணறல் உளள நோயாளிகளுக்கு சுவாசிப்பதற்கு வென்டிலேட்டர் தேவைப்படுகிறது. கொரோனா பாதிப்பு அதிகமான நிலையில், வென்டிலேட்டர் தேவையும் அதிகமானது. இதையடுதது, உள்நாட்டிலேயே வென்டிலேட்டர்கள் தயாரிக்கப்பட்டன. 

    இந்நிலையில், உள்நாட்டில் தயாரிக்கப்பட்ட 11,300 வென்டிலேட்டர்கள், மருத்துவமனைகளுக்கு சப்ளை செய்யப்பட்டுள்ளதாக மத்திய சுகாதாரத் துறை அமைச்சர் ஹர்ஷ்வர்தன் தெரிவித்தார். மேலும், 6 கோடி ஹைட்ராக்சி குளோரோகுயின் மாத்திரைகள், ஒரு லட்சம் ஆக்ஸிஜன் சிலிண்டர்கள் சப்ளை செய்யப்பட்டுளளதாகவும் அவர் தெரிவித்தார். 

    Jul 4, 2020, 14:34 PM IST
  • சாத்தான்குளம் வழக்கில் 

    மேலும் 4 பேர் கைது

    சாத்தான்குளம் வியாபாரி ஜெயராஜ், அவரது மகன் பென்னிக்ஸ் ஆகியோர் போலீசாரால் கைது செய்யப்பட்டு சிறையில் இருந்த போது திடீர் மரணம் அடைந்தனர். போலீசார் அவர்களை கொடுமையாக தாக்கியதால்தான், அவர்கள் உயிரிழந்தனர் என்று குற்றம்சாட்டப்படுகிறது. பிரேதப் பரிசோதனை அறிக்கையிலும் அவர்கள் தாக்கப்பட்டிருப்பது உறுதியானது.

    இந்நிலையில், கொலை வழக்கு பதிவு செய்யப்பட்டு இன்ஸ்பெக்டர் ஸ்ரீதர் உள்ளிட்டோர் கைது செய்யப்பட்டனர். இதன் தொடர்ச்சியாக, எஸ்.ஐ.பாலகிருஷ்ணன், தலைமைக் காவலர் முருகன், கான்ஸ்டபிள் முத்துராஜா உள்ளிட்ட 4 பேர் கைது செய்யப்பட்டுள்ளனர். 

    Jul 4, 2020, 14:30 PM IST
  • அமைச்சர் மனைவிக்கு கொரோனா..

    தமிழக கூட்டுறவுத் துறை அமைச்சர் செல்லூர் ராஜுவின் மனைவி ஜெயந்திக்கு கொரோனா பாதித்துள்ளது. இவருக்கு பரிசோதனை செய்ததில், கொரோனா தொற்று உறுதி செய்யப்பட்டதால், தனியார் மருத்துவமனையில் சேர்க்கப்பட்டுள்ளார். அமைச்சர் செல்லூர் ராஜுவு்க்கு பரிசோதனை செய்ததில், அவருக்கு தொற்று ஏற்படவில்லை.

    ஏற்கனவே அமைச்சர் கே.பி.அன்பழகன் மற்றும் அதிமுக, திமுக சட்டமன்ற உறுப்பினர்கள் சிலருக்கு கொரோனா தொற்று பாதித்து மருத்துவமனைகளில் சிகிச்சை பெற்று வருகின்றனர். 

    Jul 4, 2020, 14:26 PM IST
  • மும்பையில் கொரோனாவுக்கு

    நேற்று 36 பேர் உயிரிழப்பு

    நாட்டிலேயே மும்பை, சென்னை, டெல்லி ஆகிய  பெருநகரங்களில்தான் கொரோனா பாதிப்பு அதிகமாக உள்ளது. மும்பையில் நேற்று புதிதாக 903 பேருக்கு கொரோனா தொற்று கண்டறியப்பட்டது. இத்துடன் கொரோனா பாதித்தவர் எண்ணிக்கை 77,197 ஆக உயர்ந்தது. இதில் 44170 பேர் குணம் அடைந்துள்ளனர். நேற்று மட்டும் கொரோனா நோயாளிகள் 36 பேர் பலியாகியுள்ளனர். இதையடுத்து கொரோனா பலி 4514 ஆக உயர்ந்துள்ளது. 

    Jul 1, 2020, 13:53 PM IST