80 கோடி மக்களுக்கு நவம்பர் வரை இலவச ரேஷன்.. பிரதமர் மோடி உரை

by எஸ். எம். கணபதி, Jul 1, 2020, 09:51 AM IST

ரேஷன் மூலம் 80 கோடி மக்களுக்கு நவம்பர் மாதம் வரை அரிசி, பருப்பு போன்ற பொருட்கள் இலவசமாக வழங்கப்படும் என்று பிரதமர் மோடி அறிவித்துள்ளார்.
மத்திய அரசின் 2ம் கட்ட ஊரடங்கு தளர்வு அறிவிப்பை அடுத்து, பிரதமர் மோடி நேற்று(ஜூன்30) மாலை 4 மணிக்குத் தொலைக்காட்சியில் நாட்டு மக்களுக்கு உரையாற்றினார். அப்போது அவர் கூறியதாவது:பிற நாடுகளுடன் ஒப்பிட்டால் இந்தியாவில் இறப்பு விகிதம் மிகவும் குறைவாக உள்ளது. சரியான நேரத்தில் நாங்கள் ஊரடங்கு அறிவித்ததாலும், வேறு முக்கியமான முடிவுகள் எடுத்ததாலும் லட்சக்கணக்கான உயிர்களைக் காப்பாற்றியிருக்கிறோம்.

ஊரடங்கின் முதல் கட்ட தளர்வு அறிவித்ததற்குப் பிறகு மக்களிடம் அலட்சியம் ஏற்பட்டுள்ளதைப் பார்க்கிறோம். முகக்கவசம் அணிவது, சமூக இடைவெளி பின்பற்றுவது, கைகளை அடிக்கடி கழுவுவது ஆகிய விஷயங்களை ஆரம்பத்தில் மிகவும் கவனத்துடன் கடைப்பிடித்தோம். ஆனால், இப்போது பெரும்பாலான மக்கள் இவற்றை கடைப்பிடிப்பதில்லை. இது மிகவும் கவலை அளிக்கிறது.

அதே சமயம், இப்போதுதான் மேலும் அதிகமான கவனம் தேவைப்படுகிறது. மக்கள் இவற்றைப் பின்பற்றுவதற்கு, மாநில அரசுகள், உள்ளூர் நிர்வாகங்கள் தீவிர விழிப்புணர்வுடன் இருக்க வேண்டியது அவசியமாகிறது. அதிலும் கொரோனா பாதிப்பால் கட்டுப்படுத்தப்பட்ட பகுதிகளில் நாம் மிகவும் கவனம் செலுத்த வேண்டும்.
நாட்டின் 130 கோடி மக்கள் உயிர்களைக் காப்பாற்றும் பணியில், ஒரு ஊராட்சித் தலைவர் முதல் பிரதமர் வரை யாரும் சட்டத்துக்கு அப்பாற்பட்டவர்கள் அல்ல. ஊரடங்கு காலத்தில் மக்கள் பசியுடன் யாரும் இருக்கக் கூடாது என்பதே அரசின் முக்கியமான குறிக்கோளாக இருந்தது. ஊரடங்கு அறிவித்தவுடன், பிரதம மந்திரி ஏழைகள் நல்வாழ்வு திட்டத்தில் மக்களுக்கு நேரடியாக உணவுப் பொருட்களை அளித்தோம். தொடர்ந்து 3 மாதங்களுக்கு 80 கோடி மக்களுக்கு இலவசமாக ரேஷனில் உணவு தானியங்கள் வழங்கப்பட்டுள்ளது. ஒவ்வொரு குடும்பத்திற்கும் 5 கிலோ கோதுமை அல்லது அரிசி, 5 கிலோ பருப்பு இலவசமாக வழங்கப்பட்டுள்ளது.

தற்போது, ஜூலை 5-ம் தேதி குரு பூர்ணிமாவும் அடுத்து ஆவணி மாதத் திருவிழாக்களும் வருகிறது. தொடர்ந்து, ரக்ஷா பந்தன், கிருஷ்ண ஜெயந்தி, விநாயகர் சதுர்த்தி, ஓணம் பண்டிகைகள் வருகின்றன. நவராத்திரி, துர்கா பூஜை, தசரா, தீபாவளி, சாத் பூஜா ஆகியவையும் வருகின்றன. அதனால், மக்களின் தேவைகளும் அதிகரிக்கிறது.இதைக் கருத்தில் கொண்டு பிரதம மந்திரி ஏழைகள் நல்வாழ்வு திட்டத்தை நவம்பர் மாதம் வரை நீட்டிக்க முடிவு செய்துள்ளோம். 80 கோடி மக்களுக்கு அளிக்கப்பட்டு வரும் இலவச ரேஷன் பொருட்கள், ஜூலை, ஆகஸ்டு, செப்டம்பர், அக்டோபர் மற்றும் நவம்பர் மாதம் வரை தொடரும். இதற்காக ரூ.90 ஆயிரம் கோடி செலவழிக்கப்படும். கடந்த 3 மாதங்களில் செலவழித்த தொகையையும் கூட்டினால் ஒன்றரை லட்சம் கோடி இந்த திட்டத்துக்காகச் செலவழிக்கப்படுகிறது.

ஏழைகளுக்கும் அரசால் இந்த இலவச ரேஷன் பொருட்கள் வழங்க முடிகிறது என்றால், அதற்கு விவசாயிகளும், நேர்மையாக வரி செலுத்துபவர்களுமே காரணம். நீங்கள் உங்கள் கடமையைச் செய்தீர்கள். அதனால், ஏழைகள் இந்த கடுமையான நெருக்கடியைச் சமாளிக்க முடிகிறது. வருங்காலத்திலும் கொரோனா தடுப்புக்கான அனைத்து முன்னெச்சரிக்கை நடவடிக்கைகளையும் எடுக்கும் அதே நேரத்தில் பொருளாதார முன்னேற்றத்திற்கும் பாடுபடுவோம்.
இவ்வாறு பிரதமர் மோடி பேசினார்.


Speed News

  • மும்பையில் கொரோனாவுக்கு

    நேற்று 36 பேர் உயிரிழப்பு

    நாட்டிலேயே மும்பை, சென்னை, டெல்லி ஆகிய  பெருநகரங்களில்தான் கொரோனா பாதிப்பு அதிகமாக உள்ளது. மும்பையில் நேற்று புதிதாக 903 பேருக்கு கொரோனா தொற்று கண்டறியப்பட்டது. இத்துடன் கொரோனா பாதித்தவர் எண்ணிக்கை 77,197 ஆக உயர்ந்தது. இதில் 44170 பேர் குணம் அடைந்துள்ளனர். நேற்று மட்டும் கொரோனா நோயாளிகள் 36 பேர் பலியாகியுள்ளனர். இதையடுத்து கொரோனா பலி 4514 ஆக உயர்ந்துள்ளது. 

    Jul 1, 2020, 13:53 PM IST
  • டெல்லியில் 87 ஆயிரம் பேருக்கு

    கொரோனா பாதிப்பு

    டெல்லியில் நேற்று புதிதாக 2179 பேருக்கு கொரோனா தொற்று உறுதி செய்யப்பட்டது. இத்துடன் இங்கு கொரோனா பாதித்தவர் எண்ணிக்கை 87,360 ஆக உயர்ந்துள்ளது. இதில் 58,348 பேர் குணம் அடைந்துள்ளனர். நேற்று பலியான 62 பேரையும் சேர்த்து மொத்த உயிரிழப்பு 2741 ஆக உள்ளது.

    Jul 1, 2020, 13:45 PM IST
  • மகாராஷ்டிராவில் ஒரே நாளில்

    4878 பேருக்கு கொரோனா

    நாட்டிலேயே அதிகபட்சமாக மகாராஷ்டிராவில்தான் கொரோனா பாதித்துள்ளது. நேற்று ஒரே நாளில் 4878 பேருக்கு கொரோனா தொற்று உறுதி செய்யப்பட்டுள்ளது. இது வரை மொத்தம் ஒரு லட்ச்த்து 74,761 பேருக்கு கொரோனா பாதித்திருக்கிறது. இதில் 90,911 பேர் குணம் அடைந்துள்ளனர். இ்ம்மாநிலத்தில் 9 லட்சத்து 66,723 கொரோனா பரிசோதனைகள் செய்யப்பட்டுள்ளது.

    Jul 1, 2020, 13:43 PM IST
  • ராஜஸ்தானில் 18 ஆயிரம் பேருக்கு

    கொரோனா தொற்று பாதிப்பு

    ராஜஸ்தானில் முதல்வர் அசோக் கெலாட் தலைமையில் காங்கிரஸ் ஆட்சி நடைபெறுகிறது. இந்த மாநிலத்தில் நேற்று 354 பேருக்கு கொரோனா தொற்று பாதித்துள்ளது. இது வரை மொத்தம் 18,014 பேருக்கு கொரோனா தொற்று கண்டறியப்பட்டுள்ளது. இது வரை 413 பேர் கொரோனாவால் பலியாகியுள்ளனர். 

    ராஜஸ்தானில் இது வரை 8 லட்சத்து 24,213 கொரோனா பரிசோதனைகள் மேற்கொள்ளப்பட்டுள்ளன. இத்தனை சோதனைகளில் 18 ஆயிரம் பேருக்குத்தான் கொரோனா பரவியிருக்கிறது. ஆனால், தமிழ்நாட்டில் 11 லட்சம் பரிசோதனைகள் செய்ததில் 90 ஆயிரம் பேருக்கு கொரோனா பாதித்துள்ளது. அதே போல், தமிழகத்தில் கொரோனா பலியும் 1200 ஆக உள்ளது. 

    Jul 1, 2020, 13:40 PM IST
  • தந்தை, மகன் மரணம் குறித்த வழக்கு

    சி,பி.சி.ஐ.டி விசாரிக்க உத்தரவு

    சாத்தான்குளம் ஜெயராஜ், அவரது மகன் பென்னிக்ஸ் ஆகியோர் மர்ம மரணம் தொடர்பாக சி.பி.ஐ. விசாரணைக்கு தமிழக அரசு பரிந்துரைத்துள்ளது. இந்நிலையில், இது தொடர்பான வழக்கு மதுரை ஐகோர்ட் கிளையில் இன்று விசாரணைக்கு வந்தது. அப்போது, நீதிபதிகள் கூறுகையில், ‘‘இந்த 2 பேர் மரணம் தொடர்பான தடயங்களை மறைக்க வாய்ப்புள்ளதால்,  வழக்கை சி.பி.ஐ. விசாரிக்கத் தொடங்கும் வரை சி.பி.சி.ஐ.டி. விசாரிக்க வேண்டும்’’ என்று உத்தரவிட்டனர். 

    Jun 30, 2020, 13:33 PM IST