பட்டி தொட்டிலிருந்து வாட்சப் உபயோகிக்காதவர்களைப் பார்க்க முடியாது. பொழுதுபோக்குக்காக வாட்சப் உபயோகித்து இப்பொழுது இடைவெளியின்றி வாட்சப் உபயோகிக்கும் மோகம் அனைவரிடமும் வந்துவிட்டது. வாட்சப் மூலமாக தொடர்ந்து குற்றங்கள் அதிகரித்துக்கொண்டே வருகின்றன. குறிப்பாக பல ஊர்களில் பொய்யாக பரப்பப்பட்ட வாட்சப் வதந்திகளால் பலருடைய உயிர் பறி போனது நம் அறிந்ததே. செய்தித்தாள்களை காட்டிலும் காட்டுத்தீப் போல செய்திகள் உடனுக்குடன் பரப்பப்படும் நிலையினால், நன்மையும், தீமையும் விரைவாக நடக்கிறது.
இவை அனைத்திற்கும் முற்றுப்புள்ளி வைக்கும் வகையில் வாட்சப் நிறுவனம் ஏதேனும் மாற்று வழிமுறைகள் மற்றும் கட்டுப்பாடுகள், விதிகள் கொண்டு வரவேண்டும் என்று மத்திய அரசும், உச்ச மற்றும் உயர்நீதிமன்றங்களும் பல முறை ஆணை பிறப்பித்துள்ளது.
அதனைத் தொடர்ந்து வாட்சப் நிறுவனமும் சில மாற்றங்களை கொண்டு வந்தது. ஒருவர் தனக்குப் பிடிக்காத வாட்சப் குரூப்பில் இருந்து வெளியேறிக் கொள்ளலாம் என்றும் அப்படி வெளியேறினால் அந்தக் குரூப்பின் அட்மினால் கூட மீண்டும் உங்களை அந்த குரூப்பிற்குள் இணைத்து தொந்தரவு செய்ய முடியாது என்றும் கட்டுப்பாடுகள் சமீபத்தில் விதிக்கப்பட்டது. அதைத் தொடர்ந்து அதிக நபர்களால் பகிரப்படும் வாட்சப் பார்வட் செய்திகளை “Forwarded” என்று குறிப்பிட்டு காட்டும் வகையில் தற்போது வாட்சப் மாற்றம் செய்யப்பட்டுள்ளது.
இப்படி ஒரு பக்கம் வாட்சப் விவகாரம் இருக்க, காஷ்மீர் மாநில அரசு ஒரு கட்டம் முன்னேறி உள்ளது. அந்த மாநிலத்தில் இனி யாராவது புதிதாக வாட்சப் குரூப் தொடங்க வேண்டுமென்றால் அவர்கள் காவல் நிலையத்திற்கு சென்று, தொடங்க இருக்கும் குரூப்பின் அட்மின் யார்? குரூப்பின் நோக்கம் என்ன? குரூப்பில் எத்தனை பேர் இணைய இருக்கிறார்கள் உள்ளிட்ட முழு விவரங்களையும் கொடுத்து, அதை காவல் அலுவலர்களால் பரிசோதித்த பின்னரே வாட்சப் குரூப்கள் தொடங்க முடியும் என்ற புது விதியை உருவாக்கியுள்ளார்கள்.
காஷ்மீரைத் அடுத்து மற்ற மாநிலங்களிலும் இதைப் பின்பற்றினால் நாட்டில் நடக்கும் பெரும்பாலான குற்றங்கள் குறைக்கலாம் என்று எதிர்பார்க்கப்படுகிறது.
