வருமானத்துக்கு அதிகமாக சொத்து சேர்த்ததாக துணைமுதலமைச்சர் ஓ. பன்னீர்செல்வம் மற்றும் அவரது குடும்பத்தினர் மீது வழக்கு பதிவு செய்யுமாறு லஞ்ச ஒழிப்பு துறைக்கு உத்தரவிடக் கோரி திமுக சார்பில் சென்னை உயர் நீதிமன்றத்தில் மனுத்தாக்கல் செய்யப்பட்டுள்ளது.
ஓ. பன்னீர்செல்வம் மற்றும் அவரது குடும்பத்தினருக்கு எதிராக திமுக அமைப்பு செயலாளரும், மாநிலங்களவை உறுப்பினர் ஆர்.எஸ்.பாரதி லஞ்ச ஒழிப்பு துறையில் கடந்த மார்ச் 10-ஆம் தேதி புகார் கொடுத்தார்.
இது தொடர்பாக சென்னை உயர் நீதிமன்றத்தில் தாக்கல் செய்யப்பட்ட மனுவில், துணை முதலமைச்சர் ஒ.பன்னீர்செல்வம், அவரது மனைவி விஜயலட்சுமி, மகன்கள் ரவீந்திரநாத், ஜெயபிரதீப், மகள் கவிதாபானு மற்றும் சகோதரர்கள் பெயரில் சொத்துக்களை வாங்கி குவிக்கப்பட்டுள்ளதாகவும், ஆனால் வருமானம் குறித்த தவறான தகவல்களை தேர்தல் வேட்புமனுக்களில் கொடுத்துள்ளதாகவும் குறிப்பிடப்பட்டுள்ளது.
அத்துடன், அமெரிக்கா, துருக்கி, இந்தோனேசியா போன்ற வெளி நாடுகளில் உள்ள நிறுவனங்களிலும், இந்திய நிறுவனங்களிலும் பன்னீர்செல்வத்தின் வாரிசுகள் கோடிக்கணக்கான ரூபாய் முதலீடு செய்துள்ளதாகவும் மனுவில் குறிப்பிடப்பட்டுள்ளது.
இந்நிலையில், 2011-ஆம் ஆண்டு தேர்தலில் மனைவிக்கு 24.20 லட்ச ரூபாய் சொத்துக்கள் இருப்பதாக குறிப்பிட்ட பன்னீர்செல்வம், 2016-ஆம் ஆண்டில் 78 லட்ச ரூபாய்க்கு சொத்துள்ளதாக தெரிவித்துள்ளார்.
சேகர் ரெட்டியின் டைரியில் பன்னீர்செல்வத்துக்கு தொடர்பிருப்பதாக குறிப்பிட்டுள்ளதாகவும் 6 மாதங்களில் அவரிடம் 4 கோடி ரூபாய் பணம்பெற்றுள்ளதாக டைரியில் குறிப்பிட்டுள்ளதாகவும் மனுவில் தெரிவிக்கப்பட்டுள்ளது. இத்தகைய புகார் மீது வழக்கு பதிவு செய்ய உத்தரவிடவேண்டும் என்று மனுவில் கூறப்பட்டுள்ளது.
