சிதம்பரம், கார்த்தி வாங்கிய லஞ்சப் பணம் எவ்வளவு? சிபிஐ குற்றப்பத்திரிகையில் தகவல்

by எஸ். எம். கணபதி, Oct 19, 2019, 09:08 AM IST

ஐ.என்.எக்ஸ் மீடியாவின் வெளிநாட்டு முதலீடு அனுமதிக்காக சிதம்பரம் மற்றும் அவரது மகன் கார்த்திக்கு 50 லட்சம் அமெரிக்க டாலர் லஞ்சம் தரப்பட்டதாக இந்திரானி முகர்ஜி வாக்குமூலம் கொடுத்திருக்கிறார். இது சிபிஐ தாக்கல் செய்துள்ள குற்றப்பத்திரிகையில் தெரிவிக்கப்பட்டுள்ளது.

ஐ.என்.எக்ஸ் மீடியா நிறுவனத்திற்கு 305 கோடி ரூபாய் வெளிநாட்டு முதலீடு வந்த விவகாரத்தில் முறைகேடாக அனுமதி வழங்கியதாக முன்னாள் மத்திய நிதியமைச்சர் ப.சிதம்பரம், அவரது மகன் கார்த்தி மீது கடந்த 2017ல் சிபிஐ வழக்கு பதிவு செய்தது. அதே போல், இந்த முறைகேட்டில் சட்டவிரோத பணபரிமாற்றங்கள் நடந்துள்ளதாக கூறி, அமலாக்கத் துறையும் தனியே வழக்கு பதிவு செய்தது. இந்த வழக்கில் சிதம்பரத்தை சிபிஐ கடந்த ஆகஸ்ட் 21ம் தேதி கைது செய்தது.

சிபிஐ காவலில் வைக்கப்பட்டிருந்த அவர் செப்.5ம் தேதி திகார் சிறையில் அடைக்கப்பட்டார். கடந்த சில தினங்களுக்கு முன்பு, அவரை அமலாக்கத் துறையினரும் கைது செய்தனர். தற்போது திகார் சிறையில் இருந்து அவர், அமலாக்கத் துறை காவலுக்கு அனுப்பப்பட்டுள்ளார்.

சிதம்பரம் கைதாகி 48 நாட்கள் கடந்து விட்ட நிலையில், ஐ.என்.எக்ஸ். மீடியா வழக்கில் சிபிஐ குற்றப்பத்திரிகை தாக்கல் செய்துள்ளது. டெல்லி சிறப்பு நீதிமன்றத்தில் தாக்கல் செய்யப்பட்டுள்ள இந்த குற்றப்பத்திரிகையில் கூறப்பட்டுள்ளதாவது:

ஐ.என்.எக்ஸ் மீடியா நிறுவனத்திற்கு(தற்போது 9 மீடியா நிறுவனம்) வெளிநாட்டில் இருந்து ரூ.305 கோடி முதலீடுகள் வந்ததை வருமானவரித் துறையினர் கண்டுபிடித்தனர். இந்த முதலீடுகளுக்கு முறைப்படி மத்திய அரசிடம் அனுமதி பெறவில்லை. இதன்பின், மத்திய நிதியமைச்சகத்தின் கீழ் செயல்படும் அன்னிய முதலீடு மேம்பாட்டு வாரியம், ஐ.என்.எக்ஸ் மீடியாவின் வெளிநாட்டு முதலீடுக்கு அனுமதி அளித்தது.

இந்த அனுமதி வழங்கியதற்கு 50 லட்சம் அமெரிக்க டாலர் வரை லஞ்சமாக சிதம்பரத்திற்கும், அவரது மகன் கார்த்திக்கும் அளித்ததாக ஐ.என்.எக்ஸ். மீடியாவை நடத்திய இந்திராணி முகர்ஜி வாக்குமூலம் கொடுத்துள்ளார். மொரிசீயஸ், பெர்முடா, இங்கிலாந்து, சுவிட்சர்லாந்து ஆகிய நாடுகளில் உள்ள வங்கிக் கணக்குகளில் இந்த பணப்பரிமாற்றங்கள் நடந்துள்ளது. இது தொடர்பாக, அந்நாட்டு நீதிமன்றங்கள் மூலம்(லெட்டர் ரொகேட்டரி) தகவல்கள் கேட்கப்பட்டுள்ளது.

இந்த முறைகேட்டில் சிதம்பரம், கார்த்தி மற்றும் 10 பேர் மீதும், 4 நிறுவனங்கள் மீதும் குற்றம்சாட்டப்படுகிறது. இவர்கள் மீது இ.பி.கோ. 120பி(கூட்டுச்சதி), 420(மோசடி), 468(போலி ஆவணம்), 471(உண்மையை மறைத்தல்) மற்றும் ஊழல் தடுப்புச் சட்டப்பிரிவுகள் 9, 13 ஆகியவற்றின் கீழ் வழக்கு பதிவு செய்யப்பட்டுள்ளது.

முறைகேட்டுக்கு உதவியதாக அன்னிய முதலீடு மேம்பாட்டு வாரியத்தின் அலுவலர் அஜித்குமார் டங்டங், சார்பு செயலாளர் ரவீந்திரபிரசாத், சிறப்பு அலுவலர் பிரதீப்குமார், இயக்குனர் பிரபோத் சக்சேனா, நிதித்துறை இணைச் செயலாளர் அனுப் புஜாரி, கூடுதல் செயலாளர் சிந்துஸ்ரீ குல்லார், ஆடிட்டர் பாஸ்கரராமன், ஐ.என்.எக்ஸ். மீடியா பீட்டர்முகர்ஜி ஆகியோர் மீது குற்றம்சாட்டப்பட்டுள்ளது. அதே போல், ஐ.என்.எக்ஸ் மீடியா மற்றும் கார்த்தி சிதம்பரத்தின் நிறுவனங்கள் மீது குற்றம்சாட்டப்பட்டுள்ளது.
இவ்வாறு குற்றப்பத்திரிகையில் தெரிவிக்கப்பட்டுள்ளது.


Speed News

  • தெருவுக்கு வாங்கய்யா..

    யஷ்வந்த் சின்கா ட்விட்

    முன்னாள் மத்திய அமைச்சர் யஷ்வந்த் சின்கா இன்று ஒரு ட்விட் பதிவிட்டுள்ளார். அதில், ‘‘ஏழைகளின் துயரங்களை கவனிக்காமல், மத்திய அரசு கண்களையும், காதுகளையும் மூடிக் கொண்டிருக்கும் போது, எதிர்க்கட்சிகள் வெறும் மனுக்களை கொடுத்து கொண்டிருப்பது சரியா? இதற்கு மேலும் வெறும் அறிக்கைகள் எதுவும் பலனளிக்காது. எதிர்க்கட்சிகள் அனைத்தும் தெருவுக்கு வந்து போராட வேண்டும்’’ என்று கூறியுள்ளார். 

    May 23, 2020, 14:18 PM IST
  • சிறப்பு ரயில்கள் வேண்டாம்..

    மேற்கு வங்கம் கோரிக்கை

    மேற்கு வங்கத்தில் அம்பன் புயலால் பெரும் சேதம் ஏற்பட்டுள்ளது. புயல் மழையால் ஏற்பட்ட பாதிப்புகளை சரி செய்யும் நிவாரணப் பணிகளை மேற்கொள்ள வேண்டியுள்ளதால், தற்போது சிறப்பு ரயில்களை இயக்க வேண்டாம் எ்னறு அம்மாநில அரசு கோரியு்ள்ளது. இது தொடர்பாக ரயில்வே வாரியத் தலைவர் வி.கே.யாதவுக்கு தலைமைச் செயலாளர் ராஜு சின்கா கடிதம் அனுப்பியு்ள்ளார், அதில், சிறப்பு ரயிலில் வரும் புலம்பெயர்ந்த தொழிலாளர்களை பரிசோதனைக்கு உள்ளாக்கி, தனிமைப்படுத்துவதற்கு இயலாத சூழல் உள்ளதால், வரும் 26ம் தேதி வரை சிறப்பு ரயில்களை இயக்க வேண்டாம் எ்னறு கோரப்பட்டுள்ளது. 

    May 23, 2020, 13:57 PM IST
  • மகாராஷ்டிராவில் 44 ஆயிரம்

    பேருக்கு கொரோனா பாதிப்பு

    நாட்டிலேயே அதிகபட்சமாக மகாராஷ்டிராவில் 44,582 பேருக்கு கொரோனா தொற்று பரவியிருக்கிறது. இதில், 12,583 பேர் குணமடைந்துள்ளனர். 1517 பேர் இந்நோய்க்கு பலியாகியுள்ளனர். மாநிலத்தில் மும்பையில்தான் அதிகபட்சமாக 27 ஆயிரம் பேருக்கு கொரானா தொற்று பரவியிருக்கிறது.

     

    May 23, 2020, 13:53 PM IST
  • ஒரு லட்சத்து 6,750 பேருக்கு

    கொரோனா பரவியது..

    நாடு முழுவதும் கொரோனா பாதித்தவர்களின் எண்ணிக்கை ஒரு லட்சத்து  1,139 பேரில் இருந்து  ஒரு லட்சத்து 6,750 பேராக அதிகரித்துள்ளது. குணமடைந்தவர்களின் எண்ணிக்கை 39,174ல் இருந்து 41,298 ஆக அதிகரித்து்ள்ளது. கொரோனாவால் பலியானவர்களின் எண்ணிக்கை  3,163ல் இருந்து 3,303 ஆக உயர்ந்துள்ளது.

    May 20, 2020, 13:42 PM IST
  • மகாராஷ்டிராவில் கொரோனாவுக்கு

    1325 பேர் உயிரிழப்பு

    நாட்டிலேயே மகாராஷ்டிராவில்தான் மிகவும் அதிகமானோருககு கொரோனா பரவியிருக்கிறது. இது வரை 37,136 பேருக்கு கொரோனா தொற்று கண்டறியப்பட்டிருக்கிறது. இதில் 1325 பேர் சிகிச்சை பலனின்றி உயிரிழந்துள்ளனர். காவல்துறையில் மட்டும் 1388 பேருக்கு கொரோனா பரவியிருக்கிறது. இதில் 428 பேர் குணமடைந்துள்ளனர். 12 பேர் பலியாகியுள்ளனர். 

    May 20, 2020, 13:37 PM IST