தமிழ் தலைவாஸ் அணியை பழி வாங்கியது பெங்கால் வாரியர்ஸ் அணி

விவோ புரோ கபடிப் போட்டியில், பரபரப்பான ஆட்டத்தில் தமிழ் தலைவாஸ் அணியை, பெங்கால் வாரியர்ஸ் அணி நான்கு புள்ளிகள் வித்தியாசத்தில் வீழ்த்தியது.

புரோ கபடியின் 5-வது சீசன் போட்டிகள் நாட்டின் பல்வேறு பகுதிகளிலும் நடைபெற்று வருகிறது. இந்நிலையில், 123ஆவது போட்டி, பி மண்டலத்தில் உள்ள தமிழ் தலைவாஸ் அணிக்கும் பெங்கால் வாரியர்ஸ் அணிக்கும் நடைபெற்றது.

இப்போட்டியில், முதல் பகுதியில் தமிழ் தலைவாஸ் அணி 14 புள்ளிகளையும், பெங்கால் வாரியர்ஸ் அணி 18 புள்ளிகளையும் பெற்றது.

முதல் பாதியில் பெங்கால் வாரியர்ஸ் அணி தரப்பில், அபாரமாக ஆடிய மனீந்தர் சிங் 9 புள்ளிகளை பெற்றுத் தந்தார். அதேபோல, சுர்ஜீத் சிங் 3 புள்ளிகளையும், ஸ்ரீகாந்த் தேவ்தியா 2 புள்ளிகளையும் பெற்றனர்.

அதேபோல் தமிழ் தலைவாஸ் அணி தரப்பில் அஜய் தாக்கூர் 6 புள்ளிகளைப் பெற்றுத் தந்தார். மேலும், கே.பிரபஞ்சன் 5 புள்ளிகளை பெற்றுத் தந்தார்.

இரு அணிகளும் ரெய்டுகள் மூலமாக 11 புள்ளிகளை பெற்றனர். ஆல் அவுட் மூலம் பெங்கால் அணி 2 புள்ளிகளை பெற்றது குறிப்பிடத்தக்கது.

பின்னர் இரண்டாவது பாதியில் முன்னிலை பெற இரு அணிகளும் கடுமையாக போராடின. பின் பாதியின் ஒரு கட்டத்தில் பெங்கால் வாரியர்ஸ் 22 புள்ளிகளுடனும், தமிழ் தலைவாஸ் அணி 19 புள்ளிகளுடனும் இருந்தது.

பிற்பாதி ஆட்டத்தில் பெங்கால் வாரியர்ஸ் அணியின் கை சிறிது ஓங்கி இருந்தது. தமிழ் தலைவாஸ் அணியின் பிரபஞ்சன் ஒரே ரெய்டில் 2 புள்ளிகள் பெற்றார். அதே சமயம் வினீத் குமார் 11 ரெய்டுகளில் 9 வெறுமனே திரும்பினார். இரண்டில் டேக்கிள் ஆனார்.

பெங்கால் வாரியர்ஸ் அணியின் மனீந்தர் சிங் இந்த ஆட்டத்தில் 12 புள்ளிகளை பெற்றுத் தந்தது குறிப்பிடத்தக்கது. இறுதி கட்டத்தில் பெங்கால் வாரியர்ஸ் அணி வீரர் புபேந்தர் சிங் 3 வீரர்களை அவுட் ஆக்கியதுடன் ஆல் அவுட் மூலம் 2 புள்ளிகளை சேர்த்துப் பெற்றார்.

இதனால் தமிழ் தலைவாஸ் அணி பின்னடைவைச் சந்தித்தது. கடைசி நேரத்தில் தமிழ் தலைவாஸ் அணி வீரர் அஜய் தாக்கூர் 3 புள்ளிகளை பெற்றபோதிலும் அணியை வெற்றிபெற வைக்க முடியவில்லை.

இறுதியில் பெங்கால் வாரியர்ஸ் அணி 34 – 30 என்ற கணக்கில் தமிழ் தலைவாஸ் அணியை தோற்கடித்தது. ஏற்கனவே இரு அணிகளுக்கு இடையே நடைபெற்ற போட்டியில் தமிழ் தலைவாஸ் அணி ஒரு புள்ளிகள் வித்தியாசத்தில் பெங்காள் வாரியர்ஸ் அணியை தோற்கடித்து இருந்தது குறிப்பிடத்தக்கது.

பெங்கால் அணி ரெய்டு மூலமாக 20 புள்ளிகளையும் டேக்கிள் மூலமாக 10 புள்ளிகளையும் பெற்றது. ஆல் அவுட் மூலமாக 4 புள்ளிகளை பெற்றது.

தமிழ் தலைவாஸ் அணி ரெய்டு மூலம் 25 புள்ளிகளை பெற்றபோதிலும், டேக்கிள் மூலமாக வெறும் 5 புள்ளிகளை மட்டுமே பெற்றது. ஒரு முறை கூட எதிரணியை ஆல் அவுட் செய்யவில்லை என்பது குறிப்பிடத்தக்கது.

You'r reading தமிழ் தலைவாஸ் அணியை பழி வாங்கியது பெங்கால் வாரியர்ஸ் அணி Originally posted on The Subeditor Tamil