சச்சின் டெண்டுலகர் விளையாடும் போட்டிகளிலும் இந்திய கிரிக்கெட் அணி விளையாடும் போட்டிகளிலும் சுதிர் கௌதம், உடல் மொத்தத்துக்கும் வண்ணம் பூசி தேசியக் கொடியை கையில் ஏந்தி ஆரவாரமாக வீரர்களுக்கு உற்சாகம் கொடுப்பார்.
டெண்டுல்கரின் பரம ரசிகரான இவர், சச்சின் ஓய்வுக்குப் பின்னரும் தொடர்ந்து இந்திய அணி விளையாடும் போட்டிகளுக்கு வருவதை வழக்கமாகக் கொண்டுள்ளார். இந்நிலையில் இவருக்கு ஒரு சர்ப்ரைஸ் கொடுத்துள்ளார் `கேப்டன் கூல்' தோனி.
தனது பண்ணை வீட்டிற்கு சுதிர் கௌதமை அழைத்து குடும்பத்துடன் விருந்து கொடுத்துள்ளார். தோனியின் இந்த சர்ப்ரைஸ் ட்ரீட் குறித்து ட்விட்டரில் நெகிழ்ந்துள்ளார் கௌதம்.
அவர், `கேப்டன் கூல் தோனியுடன் ஒரு ஸ்பெஷலான நாள் இது. அவரின் சூப்பர் குடும்பத்துடன் சூப்பர் மதிய உணவைச் சேர்ந்து சாப்பிட்டேன். அங்கு நான் எவ்வளவு மகிழ்ச்சியாக இருந்தேன் என்பதை வார்த்தைகளால் விவரிக்க முடியாது. தோனிக்கும் அவரது மனைவி சாக்ஷிக்கும் மிகுந்த நன்றியை தெரிவித்துக் கொள்கிறேன். ஐபிஎல் 2018 கோப்பையை வென்ற பிறகு செம ரிலாக்ஸாக இருக்கிறார் தோனி' என்று தோனியை புகழ்ந்துள்ளார்.
