பொன்னியின் செல்வன் படத்தில் ஐஸ்வர்யா ராய் நடிப்பதாக இருந்த நந்தினி கதாபாத்திரத்திற்கு த்ரிஷாவிடம் பேச்சுவார்த்தை நடைபெற்று வருவதாக தகவல்கள் கசிந்துள்ளன.
பொன்னியின் செல்வன் நாவலை படமாக்கும் முயற்சியில் இயக்குநர் மணிரத்னம் தீவிரமாக செயல்பட்டு வருகிறார். இந்த படத்தில் பல முக்கிய கதாபாத்திரங்கள் வர இருப்பதால், பல முன்னணி நடிகர்களிடமும் மணிரத்னம் பேச்சுவார்த்தை நடத்தி வருகிறார்.
இறுதிப்பட்டியல் ரெடியானவுடன் அதிகாரப்பூர்வமாக அறிவிக்க காத்துக் கிடக்கிறார்.
முதலில், வந்தியத்தேவன் கதாபாத்திரத்திற்கு விஜய்சேதுபதியிடம் பேச்சுவார்த்தை நடத்தப்பட்டு, பின்னர் அவரது கால்ஷீட் பிரச்னை காரணமாக அந்த ரோல் சிம்புவுக்கு மாற்றப்பட்டு, பின்னர் அவர் நடிப்பதிலும் சிக்கல் ஏற்பட்டு, கடைசியில் கார்த்தி அந்த ரோலில் நடிப்பது உறுதியாகியுள்ளது என்ற செய்திகள் வெளியாகின.
ஆதித்த கரிகாலராக விக்ரமும், பொன்னியின் செல்வனாக ஜெயம்ரவியும் நடிக்க உள்ளதாகவும், நந்தினியாக ஐஸ்வர்யா ராய் நடிப்பார் என்றும் கூறப்பட்டது.
பூங்குழலியாக நயன்தாரா மற்றும் குந்தவையாக கீர்த்தி சுரேஷ் என்றும் பல முன்னணி நட்சத்திரங்களின் பெயர் பட்டியல் நீண்டு கொண்டே போகிறது.
ஆனால், இதுவரை பார்த்திபன், ஜெயராம், விக்ரம் மட்டுமே பொன்னியின் செல்வனில் நடிக்க உள்ளதை நேரடியாக அறிவித்துள்ளார்கள். ஆனால், மெட்ராஸ் டாக்கீஸ் சார்பாக அவர்கள் பெயர் கூட இன்னமும் அதிகாரப்பூர்வமாக வெளியாகவில்லை என்ற நிலையில், தற்போது, த்ரிஷாவிடம் பொன்னியின் செல்வன் படத்தில் நடிப்பதற்கு பேச்சுவார்த்தைகள் நடப்பதாக நம்பத்தகுந்த வட்டாரங்களில் இருந்து செய்திகள் வெளியாகி உள்ளன.
த்ரிஷாவுக்கு வில்லி கதாபாத்திரம் கச்சிதமாக பொருந்தும் என்பதால், நந்தினி வேடத்தில் நடிக்கத்தான் த்ரிஷாவிடம் அணுகியுள்ளதாகவும், ஐஸ்வர்யா ராய் கால்ஷீட் பிரச்னை இழுபறியாக உள்ளதால் மணிரத்னம் த்ரிஷாவை அணுகியுள்ளதாகவும் கூறப்படுகிறது.
800 கோடி ரூபாய் பட்ஜெட்டில் இரண்டு பாகங்களாக எடுக்கப்படுவதாக சொல்லப்படும் பொன்னியின் செல்வன் குறித்த அதிகாரப்பூர்வ அப்டேட் எப்ப தான் வரும் என்ற ஆவலில் ரசிகர்கள் காத்துக் கிடக்கின்றனர்.
