உலக நாயகன் கமல்ஹாசன் மிகவும் விரும்பி நடிக்கயிருந்த படம் மருதநாயகம். 1997ம் ஆண்டு இங்கிலாந்து ராணி எலிசெபத், அன்றைய முதல்வர் கருணாநிதி முன்னிலையில் இப்படத்திற்கான தொடக்க விழா நடத்தினார்.
மருதநாயகம் வேடத்தில் கமல் நடித்த காட்சிகளும் படமாக்கப்பட்டன. பட்ஜெட் கருதி படம் நிறுத்தப்பட்டது. ஆனாலும் கோடிக்கணக்கான செலவில் அரை மணி நேர காட்சிகளை கமல் படமாக்கியிருக்கிறார். வெளிநாட்டு தயாரிப்பு நிறுவனங்கள் இப்படத்தை தயாரிப்பது பற்றி பேச்சுவார்த்தை நடத்தினார். ஆனால் எதுவும் ஒர்க் அவுட் ஆகவில்லை. இதையடுத்து படம் கிடப்பில் போடப்பட்டது.
இந்நிலையில், மருதநாயகம் படம் எப்போது வெளிவரும் என்று கமலிடம் கேட்டதற்கு அதிர்ச்சியான பதில் அளித்திருக்கிறார்.
அவர் கூறும்போது,'மருதநாயகம் படத்தை நிச்சயமாக திரையில் பார்ப்பீர்கள். ஆனால் கமல்ஹாசன் இல்லாமல் வேறு நடிகர் நடித்திருப்பார். நான் வைத்திருந்த கனவுகளை யெல்லாம் இனி வேறு நடிகர்களை நடிக்க வைத்து நிறைவேற்றுவேன் தொடர்ந்து என்னுடைய ராஜ்கமல் கம்பெனி இயங்கும். என் அரசியல் பயணத்தை பாதிக்காத வகையிலான படங்களில் மட்டுமே நடிப்பேன் என தெரிவித்துள்ளார் கமல்ஹாசன்.
2021ம் ஆண்டு தமிழக சட்டமன்ற தேர்தல் நடக்கவிருப்பதால் அதில் கவனம் செலுத்து வதற்காக இப்போதிலிருந்தே படங்களில் நடிப்பதை நிறுத்த முடிவு செய்திருக்கிறார் கமல். இதனால் நடிப்புக்கு அவர் முழுக்குபோடுவாரா என்ற பரபரப்பு எழுந்துள்ளது. கமலின் இந்த பேட்டி அவரது ரசிகர்களை அதிர்ச்சியில் ஆழ்த்தியுள்ளது.
இதற்கிடையில் இந்தியன் 2 படத்தில் கமல்ஹாசன் நடித்து வருகிறார். இப்படத்தின் முக்கிய காட்சிகளை போபாலில் ஷங்கர் படமாக்கி வருகிறார்.
